Naalakkersuisut uuliamik misissuisitseqqilerusuttut
Uuliamik misissuinissamut atatillugu 48 milliuunit koruunit atorneqartussatut Naalakkersuisut pilersaarutigaat.
- Upperigatsigu peqartoq aamma Nuussuup nuua isigissagaani piffinni assigiinngittorpassuarni nuna qaavani uulia seeriinnarpoq takuneqarsinnaasumik kikkunnit tamanit, Inuussutissarsiornermut Nukissiuuteqarnermullu Naalakkersuisoq, Aqqalu Jerimiassen oqarpoq.
Uuliamik misissuiffiulersussaq Qeqertarsuup Avannaatungaani Nuussuarmiippoq. Tamatumami nalaata uuliaqarnissaa 1992-mi ilimagineqalerpoq. Taamaalilluni Namminersorlutik Oqartussat 2006-imi Nuussuarmi uuliaqarneranik misissuinerit ingerlatippaat. Nassaartoqanngimmalli 2014-imi misissuinerit tamarmik unitsinneqarput.
AAMMA ATUARUK Uuliasioqatigiiffiit Kitaata imartaanit qimarrattut
Soqutiginnittoqarsinnaasoq
Nuussuarmi uuliamik misissuineq kingulleq imaani ingerlanneqarpoq, maannalu nunami misissuisoqassalluni, uuliasiorsinnaannissamillu soqutiginnittoqarnissaa naalakkersuisup ilimagaa.
- Una nunami ingerlasussaammat imarmiunngittoq pisariinnerusussatut isikkoqarpoq taamaalilluni soqutiginninneq aamma ajornannginnerusumik ingerlasinnaavoq, Aqqalu Jerimiassen oqarpoq.
AAMMA ATUARUK Uuliasiorluni qillerinissaq imminut akilersinnaajunnaartoq
Uuliaqarneranik misissuinermi sajuppillatsitsisarluni misissuisoqassaaq. Tamannalu akikitsuinnaanavianngilaq, 48 milliuunit koruuninik naleqassasoq, Aningaasanut inatsisissatut siunnersuummi takuneqarsinnaavoq.
- Ukiuni siuliini aningaasat katersarineqarnikuusut Alcoamut tunngatillugu taakkua maannakkut Alcoa unittutut nalunaarutigineqarnikuummat, aningaasat katersorneqarnikuusut taakkunani 48 milliuuni atorneqartussaassapput tassunga. Imatut paasillugu sunniuteqartussaanngillat toqqaannaq nunatta aningaasaqarneranut uninngasooreeramik qangalili kontumi.
2019-imut Aningaasanut Inatsisissatut siunnersuut taamaatillugu akuerineqassappat Nuussuarmi uuliaqarneranik misissuineq siulleq 2019-imi martsimi aallartinnissaa naatsorsuutigineqarpoq.