Uuliasiorluni qillerinissaq imminut akilersinnaajunnaartoq

Uuliap nunani tamalaani niuffaffinni akiata appasinnera, Issittumilu uuliasiorlunilu tuniassiornissamut aningaasartuutit amerlavallaarnerat Nunatsinni uuliasiortoqarsinnaanerata ajornakusoorneranut pissutaapput, Kim Kielsen aviisimut oqarpoq.

Nunatta pigisaani uuliamit isertitassatut ilimagineqaraluartut taamaasillutik isertitsissutaasinnaannginnissaat ilimagineqalerpoq.

- Uuliap nappartamut maanna 35 dollareqarnera, Canadami nappartamut 25 dollarit ataallugit akeqarnera pissutaalluni uuliasiornissaq imminut akilersinnaajunnaarpoq, Naalakkersuisut siulittaasuata Kim Kielsenip, Naalagaaffeqatigiit Københavnimi ataatsimeeqatigeereerneranni amerikamiut nutaarsiassaqartitsiviannut Bloombergimut ippassaq oqaatigaa.

Naak Kalaallit Nunaanni uuliamik nassaartoqarsinnaanissaa ilimanaateqarluartutut nalilerneqaraluartoq, allaammi Europap uuliamik ukiuni marlunni pisariaqartitsinerattut annertutigisumik uuliaqarnera ilimagineqaraluartoq, imminut akilersinnaanngitsoq, Kim Kielsenip nutaarsiassaqartitsivimmut Bloombergimut oqaatigaa.