Uuliarluerneq issittumi akioruminaappoq

Sungiusarneq: Umiarsuaq uuliamik assartuut Qeqertarsuup kitaani ilulissamut apormat, piffissami sivisunngitsumi uulia 100 tonsiusoq, tankinit marlunnit innarlerneqartunit imaanut maqivoq.
Allattoq Elisa Isaksen
novembarip 11-at 2011 07:26

Imaluunniit tamanna sapaatip akunnerani pisuusaartitsilluni sungiusarnerup ilagaa, matumani Namminersorlutik Oqartussani Ajutoornersuaqartillugu piareersimasuutitat aamma uuliasioqatigiiffiup Cairn Energyp uuliaarluertoqarsinnaaneranut, qanoq sukkatigisumik qisuariartoqarsinnaaneranut misiliinerulluni.

Kangilinnguani Sakkutooqarfik sungiusarnermi akisussaasuusutut, sakkutuut imarsiortut qullersaqarfiat ajutoornerup annertussusianik siulliullugu ilisimatippaa. Tamatuma kingorna ajutoortoqartillugu nalunaarfigineqartussat arlalissuit nalunaarfigineqarput, ilaatigut umiarsuaq avatangiisinik saliinermi atorneqartartoq Gunnar Thorson Danmarkimit immikkut ilisimasalinnik ilaasoqarluni uuliamillu saliinissamut atortoqarluni tikittussaq nalunaarfigineqarluni.

Tamatuma peqatigisaanik Aatsitassanut Ikummatissanullu Pisortaqarfik aamma Ajutoornersuaqartillugu piareersimasuutitat Nunatsinniit peqataapput, aammattaarli Skotlandimeersunik Cairn Energymik Canadamiullu suleqatigineqartut paasissutissanik paarlaasseqatigineqarlutik.

Sungiusaqatigiinneq Kangilinnguani Sakkutooqarfiup iluatsilluarnerarpaa, naggasiullugulu erseqqissarlugu Issittumi ukiuutillugu uuliamik maqisoornermik saliineq ilungersunartuummat unammillernartuullunilu.

Uuliali 100 tons maqisimasuusaartinneqartoq qanoq pineqarsimanersoq imaqarniliami eqqaaneqanngilaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq