Uuliamik nassaarsoripput
Ilaatigut taamaaliorput, qillerutip Leiv Eirikssonip maanna qilleriffiani Nuummiit 200 kilometerinik kippasinnerusumiittumi, 909 meterinik itissusilimmi, uuliaqarsinnaaneranik aamma gasseqarsinnaaneranik pasitsaassaqartoqarmat.
Immap naqqata ataani qaleriissaarnerit 113 meterinik itissusillit nassaarineqarput, taakkulu uuliamik gassimilluunniit akoqarsinnaallutik, qilleriffigineqartorli ilungersunartuummat, nassaarineqartut iluamik suussusersiuminaassimapput.
Taamaattumik Leiv Eirikssonip qillerinini novembarip naaneranut ingerlatiinnarniarpaa, misiligutissanik itinerusumit qaqitsisinnaanissaq neriuutigineqarmat.
Aamma qillerutip Corcovadop, Nuummiit 180 kilometerinik kippasinnerusumi, 1045 meterinik itissusilimmi qillerinini suli ingerlakkallarniarpaa, tassami kulbrintemik annertunngitsumik nassaartoqarmat, tamannalu uuliaqarsinnaaneranut gasseqarsinnaaneranulluunniit takussutissaasinnaammat. Cairn Energy ullaarmanna taama nalunaaruteqarpoq.
Ukiormanna qillerinerit sapaatit akunneri marluk imaluunniit pingasut qaangiuppata naammassineqarpata, Nunatta Kitaani 2011-mi qillerinerit tamakkiisumik naliliiffigineqassasut, Cairn Energy-mit nersiorsuutigineqarpoq.
