Ilisimatooq: Utoqqaat nuukkaangata piitsuunerulertarpugut
Utoqqaat noorarnerat soraarnerussutisianut akiliutitigut nunatta karsianut sipaarutaalluni, piffissami sivikitsumi inuiaqatigiinnut iluaqutaasinnaavoq.
Noorarneralli nunatsinnut nukinnik annaasaqarfioqaaq. Inuiaqatigiit pillugit ilisimatooq taama naliliivoq.
AAMMA ATUARUK Utoqqaat Danmarkimut nuuttut ukiuni qulini marloriaatinngorsimasut
AAMMA ATUARUK Kalaallit Danmarkimiittut suli amerliartortut
- Utoqqaat noorartut tassaakkajupput inuiaqatigiinni nukissallit, taakkualu amigaatigissavagut, inuiaqatigiit pillugit ilisimatooq Ilisimatusarfimmeersoq Birger Poppel oqarpoq.
Inuuniarneq oqinnerusoq malersoraat
Taanna naapertorlugu utoqqaat noorarnerat assigiinngitsunik peqquteqarpoq. Soorlu soraarnerussutisiagissaarnerorusullutik, inuuniarnermi aningaasartuutit minnerusut peqqinnissaqarfiulluunniit iluani periarfissat pitsaanerusut ornillugit nuuttut, ilisimatooq assersuusiorpoq.
Kalaallit Danmarkimut nuuttut ukiut qulit ingerlaneranni tallimararterummik amerlisimapput, 16.370-inngorlutik.
Inuusuttut utoqqaalluunniit noorarnerat inuiaqatigiinnut annaasaqarfioqisoq, ilisimatooq oqarpoq:
- Utoqqaanerusunik suli suliaqarsinnaasunik innuttaaqatitsinnik inuusuttunillu ilinniagartuunik annaasaqaraangatta, assigiinngitsutigut piitsuunerulertarpugut. Taamaammallu politikkerit tamanna ukkatarinerusariaqagaasa ilagigaat isumaqarpunga.
Inuiaqatigiinni tapertaasinnaagaluit
Utoqqaallu nuuttut inuiaqatigiinnut, naak soraarninngoreeraluarlutik, nukinnik tunniussaqarsinnaagaluarput:
- Suli sulisut, ilinniartitsinermik ingerlatsiinnartut, siunnersortaaginnarsinnaasulluunniit. Tassalu iliiuuseqarnermikkut inuiaqatigiinni tapertaasut.
Taava aamma ilaqutariinni pingaaruteqarput, tassami aamma taakkununnga isumassuisinnaagaluit annaaneqartut, inuiaqatigiit pillugit ilisimatooq Birger Poppel oqarpoq.
