Utoqqaat Danmarkimut nuuttut ukiuni qulini marloriaatinngorsimasut

Astrid Fleischer Rex Danmarkimut nuussimasut ilagaat.

- Annernaraluarpoq, aap. Nuunniarnermik aalajangerneq oqitsuinnaanngilaq. Kisianni tappinginnginnissara siunertaralugu nuuppunga, 63-inik ukiulik, Jyllandillu avannaani Sæbymi maanna najugaqartoq, Astrid Fleischer Rex oqarpoq.

Astrid Fleischer Rexi kalaalerpassuit ukioqqortusillutik Danmarkimut nuuttorpassuit ilagaat. Kalaallit 60-it sinnerlugit ukiullit Danmarkimi najugaqartut 2008-mi 1109-upput. Maanna 2339-upput.

Tassa 110 procentinik amerleriarlutik.

Utoqqaat noorarnerat assigiinngitsunik peqquteqarsinnaavoq. Ilaat qitornatik ernuttatilluunniit Danmarkimi najugallit qanikkusullugit nuupput.

Aamma ilarpassui peqqinnissaqarfiup iluani periarfissat pitsaanerusut malersorlugit nuussimasut, KNR-imit oqaloqatigisatta oqaatigaat.

Napparsimmaveqarfinni periarfissagissaarnerusut

Astrid Fleischer Rexillu tamannarpiaq pillugu Danmarkimut nuuppoq. Taassuma isiminik qasertittoorsimagami isigisai ajorsigaluttuinnarsimapput.

- Inuilluunniit ilisarissaarakkit atuarsinnaajunnaarlungalu isikka ajortikkiartungaarmata. Taava Danmarkimut pigama paasitinneqarpunga isikka qasertittuuinnaratik aamma querteqalertunga.

AAMMA ATUARUK Flere og flere grønlændere flytter til Danmark

Nuunninilu peqqissimissutiginngilaa. Isini tamaasa maanna tamakkiisumik atorsinnaalerpai.

- Peqqinnissaqarfimmiit isikka pillugit ikiorniarneqarnera toqqissisimanareqaara kusanartorujussuarmillu sullinneqartarpunga. 

Astrid Fleischer Rex Nuummiittunik meeraqarlunilu ernutaqarpoq. Taamaammat nuunnissamik aalajangernera oqitsuinnaasimanngilaq:

- Sualuppoq ernikka pingasut ilinniareerlutik naammassereerlutik uterartullu, ernutannguakkalu nuummiilersut. Takorluunngisaannarnikuuara Nuuk qimassallugu, Astrid Fleischer Rex oqarpoq.

Paasissutissat: Naatsorsueqqissaartarfik