Adjunkti: USA-p sukannersaarnera Issittumi Siunnersuisoqatigiinni allannguisinnaavoq
Amerikamiut nunanut allanut tunngasunut ministeriata Rusland Kinalu Issittumi Siunnersuisoqatigiinni oqalugiarami sakkortuumik isornartorsiorpai.
- Ukiuni makkunani allanngorartoqarnera mianerisariaqarparput, nunat tamalaat akornanni politikki pillugu ilisimatooq, Rasmus Leander Nielsen, USA-p ministeriata oqalugiaataa pillugu oqarpoq.
Oqaatsit sakkortuut
Nunanut allanut tunngasunut ministerit arfineq-pingasut issittumut sinerialinneersut, soorlu USA-p ministeriata, Mike Pompeop, Ruslandillu ministeriata Sergey Lavrovip peqataaffigisaannik, ataatsimiipput.
AAMMA ATUARUK Ministerip sakkutooqarnikkut annertusaaneq erseqqarinngitsumik akissuteqarfigigaa
AAMMA ATUARUK Pompeop tikeraartorinissaanut Bagger Samuelsenilu qilanaartut
Issittumi Siunnersuisoqatigiinnut siunertaapput politikkit, soorlu assersuutigalugu silap pissusianut avatangiisinullu tunngasut, eqqartortarnissaat, aporfeqarpallu aaqqiissutissanik ujartueqatigiinnissaq.
USA-lli nunanut allanut tunngasunut ministeriata Mike Pompeop oqalugiarnermini sammivik ileqquusoq alarlugu sillimaniarnermut politikki, adjunktip isumaa naapertorlugu, pikkunarsaartumik eqqartulerpaa.
- Ruslandip Issittumi nunat tamalaat imartaannik aqutsiniarnera, taassumalu saniatigut Kinap imaatigut siilikeerniat aqqutaannik nutaamik pilersitsinissamik anguniagaqarneranik imaqartumik saqqummiussat, ernummatigaagut.
Ministerillu Mike Pompeop isornartorsiuinini sakkortusivaa, russit inatsisaatsuunerarlugit Kinalu Issittumi susassaqannginnerarlugu.
AAMMA ATUARUK Ruslandip Kinallu Issittumi inissisimanerat Pompeop isornartorsioraa
- Naalagaaffeqarpoq issittortaqartunik naalagaaffeqarlunilu issittortaqanngitsunik. Pingajoqanngilaq. Kina allatut isumaqaraluaruniluunniit sumilluunniit pisassaqanngilaq, Pompeo oqarpoq, taavalu Ruslandip Kinallu sunerat nakkutigeqqissaarneqartariaqarnerat erseqqissaatigalugu.
Aporaatilersinnaasut
Adjunkti Rasmus Leander Nielsenip oqarnera naapertorlugu amerikamiup oqalugiaataata issitumik suleqatigiinneq allanngortissinnaavaa.
AAMMA ATUARUK Kinamiut mittarfinnik suliaqartinneqarnissaanik USA mianersoqqusivoq
- Aarleqqutaasinnaasunik, Issittup sakkulersuuffiunnginneranut immikkuullarissuusumut allannguutaasinnaasunik aarleqqutigisinnaasatsinnik, takuvugut; tatigeqatigiinneq tammassaaq, naalagaaffiit sakkuutinikkiartulissapput, tatigeqatigiinnginneq ajornerulissaaq, Issittumi Siunnersuisoqatigiit qitiusumi inisisimajunnaassapput suleqatigiinnerlu isumaarukkiartorluni, Nielsen oqarpoq.
Aarlerisariaqalernissatsinnulli suli pissutissaqanngilaq, aporaanneq sakkortunngimmat.
- Pissaanilissuit nillertumik sorsuunnermisulli taamani aporaannerannisulli ineriartornernik isigivugut. Tamaanga suli pinngilagut. Kisianni taama iliartortoqarsinnaaneranut takussutissaqarpoq, nunat tamalaat akornanni politikki pillugu ilisimatooq oqarpoq.
