Pompeop tikeraartorinissaanut Bagger Samuelsenilu qilanaartut
Nunanut allanut tunngasunut naalakkersuisoq, Ane Lone Bagger, aamma Danmarkip nunanut allanut tunngasunut ministeria, Anders Samuelsen tikeraartitsisuussapput. Pompeop Nuummi tikeraarnermini aamma Naalakkersuisut siulittaasuat Kim Kielsen naapissagaa, nunanut allanut ministereqarfik tusagassiutinut allappoq.
Nunatta tikeraartoqarnerani USA-p kunngeqarfiullu Danmarkip issittumi ataatsimut soqutigisaat USA-llu nunatsinni suliaminik annertusasinnaanera oqaloqatigiissutigissagat, tusagassiutinut nalunaarummi allassimavoq.
Sorpiaalli oqaloqatigiissutigineassanersut suli saqqummiunneqanngilaq. Tassami KNR-ip USA-p nunanut allanut ministereqarfianut saaffiginnissutaa suli akineqangilaq Danmarkillu nunanut allanut ministereqarfia itisiliissutasumik oqaseqarumanani.
AAMMA ATUARUK USA-p nunanut allanut tunngasunut ministeria Nuulialersoq
Kisianni nunanut allanut tunngasunut naalakkersuisup Ane Lone Baggerip Pompeo-p nunatsinnut tikilluaqqunissaa qilanaaraa:
- Nunanut allanut ministeri Pompeo amerikamiut nunatsinniinnerat pillugu oqaloqatiginisdsaanut qilanaarpunga. Suleqatigiinnitta tamatsinnut iluaqutaasumik ukiorpassuarnilu suleqtigiinnitsinnut naapertuuttumik nukittorsarnissaa kissaatigaarput, Ane Lone Bagger oqarpoq unalu erseqqissaatigalugu.
- Issittup eqqissiviilliorfiunnginnissaa, kisianni aamma amerikamiut nunatsinninnerisa inuiaqatigiitsinnut pissarsiaqaaataanissaa kissaatigaarput.
Nunanut allanut ministeri, Anders Samuelsen, sisamanngorpat tikeraartroqarnissamut aamma qilanaarpoq:
- Tikeraarnikkut issittumik pissutsit Kunngeqarfik Danmarkimillu suleqateqarnerup USA-p qanoq pingaartitsiginerlugit takutikkumavaa. Amerikamiut nunatsinniisitsinertik ukiuni aggersuni suli tamatigooornerulersissagaat, ilimagaara. Tamanna Danmarkimut Kalaallit Nunaannullu pitsaasuussaaq, nunanut allanut ministeri oqarpoq.
Mike Pompeop Kangerlussuaq aamma tikerassavaa, tassani sakkutuutut sillimasuusut New York Air National Guardimeersut naapissavai.
Pompeo Nuummi tikeraarnera ministerit Issittumut Siunnersuisoqatigiinni Rovaniemimi Finlandimiittumi sapaatit akunerata tulliani ataatsimeereerneranni pissaaq.
