UNICEF-ip nuna tamakkerlugu imigassamut politikkimik piumasaqartoq: Meeqqat angerlarsimaffimminni toqqissisimanngillat

Unicefip imigassarsisinnaaneq inersimasut inuttut pisinnaatitaaffigigaat tusakatappaa.

- Taamaattoqanngilaq! Unicefip Kalaallit Nunaanni pisortaa, Tina Dam KNR-imit apersorneqarluni oqarpoq.

- Taarsiullugulu inuit pisinnaatitaaffiinik meeqqallu pisinnaatitaaffiinik illersuisoqarnissaa pisinnaatitaaffiuvoq, taanna oqarpoq.

Unicefip meeqqat nakuuserfiunngitsumik atornerluiffiunngitsumillu inuuneqarnissaat inersimasut imigassarsisinnaanissaannit  eqqarsaatigineqarnerusariaqartoq tusagassiuutinut nalunaarummi saqqummiunneqaqqammersumi allappaa.

Oqaluinnarnermit maannakkut iliuuseqartoqassasoq

Unicefip meeqqat inuusuttullu inersimasut imigassartorpallaaraangata ulluinnarni ersillutillu nalornissuteqartarnerminnik nassuiaateqartut piffissami sivisuallaartumi tusartarpaa.

Taamaammat Naalagaaffiit Peqatigiit suliniaqatigiiffiata politikkikkut iliuuseqartoqarnissaa kaammattuutigaa.

- Iliuuserisarsimasarput naammanngilaq, Tina Dam oqarpoq. 'Ajornartorsiummik qanoq qaangiisoqarsinnaaneranut aqqutissiornissamut tunngassuteqarpoq'.

Imigassaq pillugu politikki upernaaq manna ataatsimiinnermi oqaluuserisassaneeqqippoq. Nivi Rosingip IA-meersup ataatsimoortumik imigassaq pillugu politikkimik siunnersuuteqarsinnaanerup oqallisiginissaa siunnersuutigaa.

Unicefili ersarissumik nalunaarutissaqarpoq: Oqallinnissamut piffissaq qaangiuppoq.

- Meeqqat angerlarsimaffimminni toqqissisimanatik oqaluttuuppaatigut. Tamanna ilungersunarluinnarpoq. Oqariartuut ukiut tamaasa uteqqiaannavippat oqallisiginniinnarsinnaanngilagut, meeqqat iliuuseqarluta akisussaaffimmik tigusinissarput pisariaqartippaat, Unicefip Kalaallit Nunaanni suliniutaani pisortaq, Tina Dam oqarpoq.

- Meeqqat iliuuseqartoqarnissaa amigaatigaat, taanna oqarpoq, piffissallu ingerlanerata sivitsoriartornerani ajornartorsiutip iliuuseqarfiginissaa ajornarsigaluttuinnarpoq.

- Meeqqat ukioq manna siornalu ataatsimeersuarnerminnit ersarinnerusumik oqaatigisinnaanngilaat, taamaammat iliuuseqarfiginissaa ajornakusuulingajalerpoq, Tina Dam oqarpoq.

Nuna tamakkerlugu imigassamut politikki

Suliniaqatigiiffiup suliniutit meeqqanut inersimasut aalakoornerannik illersuisut, toqqissisimanermik qulakkeerisut, imigassartorfiunngitsumik ataatsimoorfiusut aamma ilaqutariinnut atornerluiffiusunut tapersersuinermut pitsanngorsaataasut kissaatigai.

- Meeqqat nipitik atorpaat. Inersimasut tusarnaarnissamut iliuuseqarnissamullu piareersimanersut apeqqutaavoq, Tina Dam oqarpoq.

Taassuma politikerit qanittukkut iliuuseqarnissaat aamma tusarnaaginnannginnissaat neriuutigaa, kinguaariimmi tulliuttut sunnerneqarput.

- Piffissaq ungasinnerusoq eqqarsaatigalugu kinguaariit, siunnersuutaat iliuuseqarfigineqarneq ajortut tunniutiinnaratarsinnaanissaat aarlerinarpoq.

Taamaakkaluartorli neriuuteqarluarpoq.

Unicefip Meeqqanik Sullissivik suleqatigalugu ajornartorsiutaasoq sammingaatsiarpaa, Tina Dam oqarpoq, politikerinillu suliaqartitsiniarnissamut pilersaaruteqarpoq.

- Qanimut malinnaaffigissavagut, taanna oqarpoq.

Imigassaq ajornartorsiummut pissutaasoq

Nakuusap isummersorfii, Meeqqat Isummersorfiilu aqqutigalugit meeqqat inuusuttullu assigiinngitsunik ukioqartut aaqqiagiinngissutaasut, nakuusernerit, inersimasut toqqissisimatitsisut ulluinnarni amigaataaneri arlaleriarlutik oqaatigaat.

- Aap, ukiuni arlalinni taamaaliorput, taakkulu meeqqat allat ajornartorsiuteqarnerat aamma eqqumaffigaat, suliniummi pisortaq oqarpoq.

Meeqqat ukioq manna ataatsimeersuarneranni ernumassutigineqartoq oqaatigineqaqqippoq: toqqissisimasoqarnerunissaa aamma inersimasut akisussaassuseqartut amigaatigaat, taakkulu maannakkut iliuuseqartoqarnissaa kissaatigaat.

Ajornartorsiutaasut paasissutissanik uppernarsarneqarput, taakku imigassaq ajornartorsiutinut ilungersunarnerpaanut, meeqqat inuuneranni ilaasunut pissutaasoq takutippaat, Unicef tusagassiuutinut nalunaarummi allappoq. Ajornartorsiutit nakuusernermik, naapertuilluanngitsuliornermik sumiginnaanermillu ilaatigut ilaqarput.

- Pissutsit meeqqat atugarliorfigisaat takugaangatsigit imigassamik atornerluineq ilaasarpoq. Tamanna nalaatsornerinnaanngilaq, aalajangersimasumillu pissutaasarluni, Tina Dam oqarpoq.