Imigassamik aalakoornartortalimmik tuniniaaneq allanngortinneqartoq
Imigassat aalakoornartortallit maajip aallaqqaataat sioqqullugu ullaakkut nalunaaqutaq quliniit unnukkut arfineq pingasunut pisiarineqarsinnaasaraluarput. Arfininngornernili tulliuttuni tallimani tamanna allanngortinneqarpoq.
Arfininngornermimi misiliutitut aatsaat ullup-qeqqaniit pisiarineqarsinnaalissapput, tamanna Kalaallit Nunaanni Politiit suleqatiserinninneratigut aalajangerneqarpoq.
- Tallimanngornerup unnuaani arfininngornerullu ullaassaani politiit ulaperuluttarneri pissutigalugu kingusinnerusukkut ammartalersinnaannginnerigut aperineqarnikuuvugut. Suliat assigiinngitsut nangikkiaasut, toqqissiviilliortut, nipiliortut tamakku pinaveersaartinniarlugit, Brugseni Nuummi pisortap tullersortaa Asta Hyldgaard oqarpoq.
Imigassanik aalakoornartortalinnik tallimanngornermi pisiniartoqarnerusartoq Brugsenimiit oqaatigineqarpoq, arfininngornerullu ullaavani aamma pisiniartoqarluartarpoq.
Imigassanik aalakoornartortalinnik tuniniaaqqittartut ikilisinniarlugit taama killilersuisoqartoq Asta Hyldgaard oqaluttuarpoq.
- Maani Brugseni Nuummi anginermi takussaavallaarneq ajorput immaqa ataasiakkaaqartarpoq. Kisianni Brugseneeraq Kongevej uagutsinnut atagami tassani maluginerusarparput pisiniakaasut. Qinngorput, Nathalie, Nuukullakkut aamma taakku arlaatigut malugisarsimassavaat ullaakkut pisiniakaasut, taanna oqarpoq.
Imigassat aalakoornartortallit ammasarfiisa avataatigut tuniniaaqqittoqannginnissaa anguniarlugu amerlasuukkaanik pisisartut aamma killilersimaarneqarput. Taamaammallu arlalinnik pisiassaqartut pisiniartitsisut alapernaaffigissamaarpaat.
Innuttaasut ilaannit isumaqatigineqartoq
Illoqarfiit pingaarnersaanni inuit aqqusinermi KNR-imit naapitagut misiliut qanoq isumaqarfigineraat aperaagut. Misiliinerlu tamanna inunnit isumalluarfigineqarpoq.
Imigassaq aalakoornartoq inuiaqatigiinni ajornartorsiutaasoq Katrine-Louise Therkelsen isumaqarpoq.
- Uanga nammineq imertannginnama, atuisuunnginnama iluarissagaluarpara unissagaluarpat. Uanga isumaqarama imigassaq aalakoornartortalik iluaqutaanngitsoq, imigassarlu nunatsinni atugaanermik, Katrine -Louise Therkelsen oqarpoq.
Dina Tobiassenillu Katrine-Louise Therkelsen isumaqatigaa.
- Isumaqatiginaqaaq. Aamma matugaangamik matusassagaluaramik ilumoortumik. Imigassaq aalakoornartortalik kinguarsaaterujussuugami nunatsinni, Dina Tobiassen oqarpoq nangillunilu:
- Naalagaagaluaruma matoqqasassagaluarput arfininngornermiluunniit. Inuiaqatigiinnitsinnut imigassaq atuipiluutit suulluunniit kinguarsaataasorujussuupput, taanna oqarpoq.
Imigassanik killilimmik pisititsineq arfininngornikkullu ulloqeqqaniit ammaaneq Edvard Geislerip pissusissamisoorsoraa:
- Isumaqarpunga taama aaqqiiniarneq pissusissamisoortoq. Imigassaarnianut pisiniartartut tamatuminnga nassataqartitsisaramik soorlu sulisussanut sinitsaaliuineq, meeqqanut atuariartortussanut kiisalu sapaatip akunnerisa naanerani aamma eqqissillutik sinissinnaagaluit tassuunakkut akornuserneqartarput.
- Imminuinnaq eqqarsaatiginani kisianni meerartagut, aammalu inersimasut utoqqaallumi aamma eqqarsaatigineqartariaqarput, taanna oqarpoq.
Siunissami tamanna attatiinnarneqassanersoq nalilersuisoqassaaq
Maajimi arfininngornerit tallimaasut qanoq pisoqarfiuneri ilinniarfiussasut, taamatullu misiliineq siunissami attatiinnarneqassanersoq naliliiffigineqarumaartoq Asta Hyldgaardip ilanngullugu oqaatigaa.
- Arfininngornerit nalunaarsuiffigiumaarpagut, qanoq ingelariuseqarsimanerluta suut ingerlalluarpat suullu ingerlalluanngillat tassunga killikkumaarpugut, taanna oqarpoq.
Imigassamik aalakoornartortalimmik killilimmik tuniniaaneq, Pisiffimmi, Akikimi Sparimilu illoqarfinni tamani aamma atuutissaaq. Pilersuisoqarfiilli nalinginnaasumik ammaannassapput.
Imigassamik aalakoornartortalimmik sapaammi pisisoqarsinnaanngilaq.
