Kommune Qeqertalimmi politikeriusimasoq: - Pilersaarutinik takorusuppugut
Aasianni Polar Raajat matoratarsinnaanera sulisunut innuttaasunullu ernumalersitsivoq.
Polar Seafoodimmi Aasianni aalisakkerivia matussagaluarpat sulisut 115-it missaanniittut suliffissaarutissapput, kommunimullu tamanna aningaasaqarnikkut sunniuteqassasoq, Kommune Qeqertalimmi Borgmesteri Simigaq Heilmann KNR-imit apersorneqarnermini oqaatigaa.
Innuttaasullu inissisimavik nalorninartumiitsillugu kommunip siunissamut qanoq pilersaaruteqarnera paasisaqarfigerusukkaat kommunimi ukiuni 17-ini politikeriusimasoq Timooq Mølgaard oqarpoq.
- Pilersaarutinik takorusuppugut susoqalernersoq, uagut ulluinnarni pisunut malinnaasuusugut tamakkua isigalugit paasissutissinneqanngikkaangatta soorunami ernumaneq takkukkiartuaartarpoq paasissutissallu sukumiisut pisariaqartilertarlutigit, Timooq Mølgaard oqarpoq nangillunilu:
- Sivitsulersumik massakkumut suli annerusumik aamma naalakkersuisoqarfimmiit tusartinneqanngilagut Aasianni susoqassanersoq. Tusartuaannarparput tunisassiorfik Polar Raajat nalorninartorsiortoq isumaqatiginninniarnerlu ingerlasoq kisiannilu paasissutissinneqassanata, taanna oqarpoq.
Kommunip sulinera naammaginanngitsoq
Polar Seafoodip aalisakkerivia matuneqassanersoq suli nalorninartumiimmat, kommunip atassuteqarnera naammaginanngitsoq politikeriusimasoq isumaqarpoq.
- Pissutsit taamaatsillugit kommunip sulinera naammaginartutut nalilersinnaanngilara, taanna oqarpoq.
Aasianni innuttaasut suliffeqarfiillu arlallit apriilimi akerliussutsimik marloriarlutik takutitsipput, akerliussutsimillu takutitsinermi aaqqissueqataasup Bolethe Hendriksenip kommunimit qinikkaniillu pilersaarutinik saqqummiussisoqannginnera oqaatigaa.
Innuttaasulli namminneq iliuuseqartarnitik utertitsiffigineqarneq ajormata qinikkat iliuuseqarnertik pimoorullugu aallartissagaat, Timooq Mølgaard neriuuteqarpoq.
Umiarsualivik aserfallatsaalineqartariaqartoq
Kommunimulli isornartorsiut taannaannanngilaq.
Umiarsualiviummi aserfallakkaluttuinnartup nutartertariaqavinneranik Sulisitsisut Qeqertarsuup Tunuani immikkoortortami siulittaasuata Søren Hansenip oqaaseqarnera Timooq Mølgaardip ilalerpaa.
- Ulluinnarni umiarsualiviup qanitaani suliffeqarpunga taava Sulisitsisut peqatigiiffiata siulittaasuata Søren Hansenip oqaaserisai ilalerpakka.
Taamaammallu umiarsualiviup aserfallakkiartulersup nutarterneqarnissaa Namminersorlutik Oqartussanit kommunimiillu pisussaaffittut isigalugu sukumiisumik aserfallatsaaliisoqartariaqartoq, taanna isumaqarpoq.
Taassumalu Kalaallit Nunaanni Sullivinnik Nakkutilliisoqarfimmit ullormiit ullormut matuneqarataannaanera ernummatigaa:
- Tassami oqarutta ullormiit ullormut ima ajortitsigivoq imaassinnaavoq talittarfik sullivinni nakkutilliisoqarfinninngaanniit matuneqariasaartoq. Tamakkuuku sioqqullugit iliuuseqarfigisassatut kaammattuutiginartut eqqornerlunneqaatiginnginniassagatsigu, Timooq Mølgaard oqarpoq.
Taamaammat Namminersorlutik Oqartussat Kommune Qeqertallillu siunissamut pilersaarutit innuttaasunut piaartumik saqqummiutissagaat taassuma neriuutigaa:
- Neriuinnarpunga paasissutissat pisariaqartitagut kommuniminngaanniit immaqalu Namminersorlutik Oqartussaninngaanniit Aasiammiunut saqqummiunneqarumaartut.
