HIV-mik tunillatsissimasut inuusuttuummata nakorsaanerup ernummatigaa

- Inuusuttut marluk HIV-mik tunillatsissimanerat ernumanaateqarpoq. Manna tikillugu tunillatsittut utoqqasaajunerusarsimapput. Tunillatsissimasut nutaat taakku marluk, HIV-ip inuusuttut akornanni tuniluutilersinnaanera navianarnerulersippaat, Nunatsinni Nakorsaaneq Henrik Trykker tusagassiutinut nalunaaruteqarnermini allappoq.

- Innutaasut usuup puuinik sillimmarserlutik atuinikkut imminnut illersorsinnaaqqullugit, pisup ammasumik avammut nalunaarutiginissaa toqqarparput, Nunatsinni nakorsaaneq nangippoq.

Aamma atuaruk Geninik ilisimatusartup HIV-p nunatsinni siaruaannera misissuiffigigaa

HIV virusiuvoq tappiorannartoq inuup nappaatinut akiuussinnaassusaanik aseruisartoq. AIDS-imik nappaateqalerneq tamatuma kingunerisinnaavaa.

- Isumannaatsumik atoqatigiittarnissap anguniarnissaanut Nunatsinni annertuumik unammilligassaqarpugut. Kinguaassiuutitigut nappaatit annertuumik atugaanerat naartuersittartullu amerlanerujussuat, tamatuma ilaatigut takussutissartaraa. Ajornartorsiut anigussagutsigu ukkassilluta pisortaqarfiit akimorlugit iliuuseqartariaqarpugut, Henrik Trykker oqarpoq.

Inuk HIV-mik tunillatsissimasoq paasineqaraangat, atoqatigisimasat tunillatsissimasinnaanermut misissortissinnaaqqullugit peqqinnissaqarfimmit paasiniaaneq aallartittarpoq.

Aamma atuaruk VIDEO Syfilis qaammarsaanikkut illersuuteqarnikkullu akiorniarneqassaaq

Tunillatsissimasut amerlanersaasa nappaateqarnerannut ersiutinik ingalassimaartistsisinnaasunik sunniuteqarluartunik maanna nakorsaateqartoq, Nunatta nakorsaanera allappoq.

Ukiuni kingullerni nappaammik tunillatsittut ukiumut ataatsimiit pingasunut amerlassuseqartarput. Tunillatsittut agguaqatigiissillugit 50-it pallingajallugit ukiuliusarsimapput.