Geninik ilisimatusartup HIV-p nunatsinni siaruaannera misissuiffigigaa
HIV-p tuniluuttarnerata misissuiffiginissaanut atatillugu nunarput misissuiffissatut piukkunnaateqarluartoq paasineqarsimavoq. Nunatta innuttaasukinnera inoqarfiillu siammasissuuneri tamatumunnga pissutaapput. Aammattaaq HIV-p tuniluunnera peqqinnissaqarfimmit sukumiilluinnartumik nassuiarneqarsimavoq, kisitsisillu pigineqartut misissuinissamut atoriaannaallutik.
Christian Bruhn Københavnip Universitetiata geogenetikimik misissuisoqarfiani ph.d.-tut allaaserisaqarnerminut atatillugu taamaaliorsimavoq.
Angutip kalaallip virusi Danmarkimit 80-ikkunni nunatsinnut eqqussimavaa nunaqarfimmilu tunillaasimalluni. Virusi anguteqatinoortut akornanni tunillaassuuteqqaarpoq, sivittunngitsorli arnanut aamma tunillaassuutilerluni, nittartakkakkut atuagassiaq videnskab.dk taama allaaserisaqarpoq.
1989-imilu nunaqarfimmit pineqartumit matu illoqarfinnut allanut ammarneqarporlusooq. Arnap nunaqarfimmiup angut Nuummut Sisimiunullu attuumassuteqartoq tunillappaa, taassumalu virusi illoqarfinnut anginerusunut nassataraa.
Virusi taanna illoqarfinnut anginerusunut eqqunneqarmat HIV-virusit allat taakkununnga pereersimapput, nakorsallu paasititsiniaanerit siunnersuutissallu allatut atorlugit virusi pillugu paasititsiniaapput, siunnersuutigineqartulli tamanut anngutinngitsoorput.
Virusi nunaqarfimmeersoq angerlarsimaffeqanngitsut imerajuttullu akornanni tuniluutilerpoq taakkunanngaanniillu aamma siaruaalluni.
- Pineqartut usuup puuinik atuisoqarnissaanik siunnersuuteqartoqarnera kingusippallaartukkut aatsaat tusaaniarsimassagaat ilimanartoq, Christian Bruhn Videnskab.dk-mut oqarpoq.
Peqatigitillugu misissuinerup aamma takutippaa HIV 25-eriarlugu Nunatsinni paasineqarsimasoq, tunillatsissimasulli amerlanerpaartaat angummit nunaqarfigisaminut virusimik eqqussisumeersuusut.
Suliamili HIV-p Kalaallit Nunaannut qanoq kimillu eqqunneqarsimanera kisiat pineqanngilaq.
HIV-p virusiata tuniluukkiartornerata arriitsuinnaaneranik arlalinnillu aporfeqarneranik aamma takutitsivoq.
Assersuutigalugu Danmarkimit Kalaallit Nunaannukaanneqartussaavoq, nunaqarfimmit illoqarfimmukaanneqartussaalluni minnerunngitsumillu inuit atugarliortut akornanni tuniluuttussaassalluni.
HIV-p tuniluunnerata akiorniarneqarnissaanut atatillugu ilisimasat tamakku pingaaruteqarput. Nunatsinniinnaanngitsoq nunarsuulli sinnera, tuniluunneratalu unitsinniarnissaanut sutigut iliuuseqartoqarnissaanut aamma tikkuissiiluartoq, Christian Bruhn Videnskab.dk-mut taama nassuiaavoq.
