Grønlandsbanken umiatsiaraasortunut aningaasaliisarunnaartoq
GrønlandsBanken umiatsiaararsortunut aningaasaliisarunnarpoq.
Umiatsiaararsortoqarpallaalunilu aningaasarsiorneq imminut nammassinnaajunnaavissimasoq aalajangernermut ilaatigut tunngavigineqartoq, Sermitsiaq.AG allaaserisaqarpoq.
Umiatsiaaqqanut nutaanut atortunullu aningaaserivimmit aningaasanik atorniartarneq unitsinneqarpoq.
Sinerissap qanittuani umiatsiaasarsorlutik aalisartut ukiuni kingullerni amerleriarujussuarsimanerat, aalisarnerlu aningaasatigut piujuaannartitsinissarlu siunertaralugu imminnut nammassinnaajunnaavissimasoq, aningaaseriviup pisortaa isumaqarpoq.
AAMMA ATUARUK Uumassusileritooq qaleralittassiissutit annertusineqarnerannut: Piniinnarsinnaanngilasi
Pisassiissutit annertuallaarujussuareersut allanngorteqqinneqarput, Tamanna piujuaannartitsinissamut aningaasaqarnermullu innarliisinnaasoq, Grønlandsbankenip pisortaa Martin Kviesgaard Sermitsiaq.AG-mut oqarpoq.
Umiatsiaararsorlutik aalisartut amerleriarujussuarsimapput, pisassiissutigineqartartullu Pinngortitaleriffimmit innersuussutigineqartunit qaangerneqartuaannarlutik.
Ullumikkut taamatut aalisartoqartillugu pisisartutta aningaasaliiffigisarnerisa ingerlatiinnarnissaat aarlerinartuusoq isumaqarpugut, Kalaallit Nunaannullu tamanna ajornartorsiutaasoq isumaqarpugut, bankip pisortaa Martin Kviesgaardoqarpoq.
Atuisartutoqqanut itigartitsisartut
Bankip atuisartutoqqaminnut itigartitsinissartik pisortap ajuusaarutigaa, aalisartulli aningaaserivimmit atukkaminnik taarsiinissaannut aalisakkat naammakkunnaarsimasut nalilerneqarpoq:
- Ilaqutariit umiatsiaaqqanut, motoorinut qeqertallu akornisigut aalisarnermut atortussanut atortut ukiualuit ingerlaneranni taarsiisussaapput. Maannakkutulli isikkoqarneratigut pisussaaffiup naammassinissaa ajornakusoortilissagaat ernumassutigaarput. Aalisartorpassuarnut aalisakkat naammanngillat, Martin Kviesgaard oqarpoq.
Atuisartussinnut umiatsiaararsortunut tamanna qanoq sunniuteqassava?
- Ilaasa taama inuussutissarsiuteqarunnaarnissaannik kinguneqassaaq. Aalisartorpassuarnut aalisakkat ikippallaarput. Soorunami ikiorusuppagut, tamarmilli aalisarnermiiginnarusunnerlutit inuussutissarsiutinilluunniit allanik ingerlataqalerusunnerlugit isumaliutigissavaat, Martin Kviesgaard oqarpoq.
