Uumassusileritooq qaleralittassiissutit annertusineqarnerannut: Piniinnarsinnaanngilasi
Qaleralittassiissutit annertusineqarnerat Qeqertarsuup tunuani aalisartunit nuannaarutigineqarpoq, Pinngortitaleriffimmeersunilli nuannaarutigineqanngilaq.
- 8.000 tonsinik ukiut tamaasa qaleralinniartoqartarnera siunissami ingerlanneqaannarsinnaanngilaq. Taamaattumik qalerallit aarlerinartorsiortitaalernissaat pinngitsoortinniarlugu taamatuttaaq angisuunik ukioqqortuunillu qaleralittoqaqqittalernissaa qulakkeerumallugu qaleralittaassiissutigineqartartunit annikinnerusunik qaleralittassiisoqartarnissaanut innersuussuteqartarpugut.
Pinngortitalerifimmi uumassusileritooq Rasmus Nygaard oqarpoq.
Qaleralittassiissutit tamakkerneqangajalernerat pissutigalugu Qeqertarsuup tunuani aalisartut qaleralinniarnerat sapaatit akunneranni uani unittussaassaammat Naalakkersuisut aalajangerput qaleralittassiissutit annertusineqassasut, Aalisarnermut, Piniarnermut Nunalerinermullu Naalakkersuisoqarfik taama allappoq.
Sinerissap qanittuani qaleralittassiissutigineqareersut 2.400 tonsinik annertusineqarmata katillugit 10.580 tonsinngorput. Taakku affaasa missaat 5.120 tonsiusut Qeqertarsuup tunuani uumassusilerituut innersuussutaat naapertorlugit qaleralittassiissutigineqarput.
Qaleralittassiissutigineqareersut annertusineqarnerisa ilutigisaannik Qeqertarsuup tunuani umiatsiaararsorlutik aalisartunut ukiup sinneranut qaleralittassiissutigineqaqqittut 1.373 tonsiupput.
AAMMA ATUARUK Naalakkersuisut qaleralittassiisutit amerlivaat
Qaleralittarineqartartut milliartuinnavipput
Uumassusilerituut Qeqertarsuup tunuani qaleralinnik 2018-imi misissuineranni inernerusut takutippaat, aatsaat taama mikitigisunik qaleralittoqartalersimasoq. Qalerallit suli alleqqajanngitsut aalisarneqartarput.
- Ukiuni 15-ini kingullerni angisuunik ukioqqortuunillu qaleralittoqartarmat maanna qaleralittarineqartartut taakkunanit ukiukinnerullutillu mikinerupput, taamaammat qaleralittat tulaassorneqartartut agguaqatigiisillugu angissutsimikkut milliartorput, Rasmus Nygaard oqarpoq.
Rasmus Nygaardillu oqarnera naapertorlugu ukioq manna qaleralittarineqartut anginerunavianngillat.
- Takusinnaasakka malillugit maannamut tulaassorneqareersut 2018-imi tulaassorneqartullu angeqqatigiipajaarput, Rasmus Nygaard oqarpoq.
AAMMA ATUARUK IA, Siumut Demokraatillu: Qaleralittassiissutit amerlineqarneri ajunngilluinnarpoq
Rasmus Nygaardili isumaqarpoq, ukioq manna aggustip naanera tikillugu qaleralittarineqarsimasut 6000 tonsiinnangajaasimammata qaleralittassiissutit Naalakkersuisunit annertusineqarnerat ilutigalugu ilassutitut qaleralittassiissutigineqartut Qeqertarsuup tunuani aalisartunit tamakkerneqarnavianngitsut.
- 2018-imi qaleralittarineqartut katillugit 8400 tonsiusut annertoqatigingajappaat, Rasmus Nygaard oqarpoq.
