Naalakkersuisut qaleralittassiisutit amerlivaat

Qeqertarsuup Tunuani umiatsiaararsorlutimmi aalisartut pisassaat sapaatit akuunneranni uani nungulersut, Aalisarnermut, Piniarnermut Nunalerinermullu Naalakkersuisoqarfik allappoq. Naalakkersuisut taamaammat pisassiissutit amerliniarlugit aalajangerput.

Pisassiissutit 2.400 tonsinik amerlineqarput, katillutik 10.580 tonsiulerlutik. Pinngortitaleriffimmiit inassuteqaataavoq, tamaani tamatuma affaata missaat, tassa 5.120 tonsit aalisarneqassasut.

AAMMA ATUARUK Qaleralittassiissutit uumassusilerisut inassutigisaannut naleqqussarniaraat

Pisassiissutit umiatsiaararsortunut angallatinullu anginerusunut avinneqarput. Umiatsiaaqqqaniit aalisartut taamaalillutik 1.373 tonsinik qaavatigut pisassaqalerput.

Pisassiissutit ukiup qaammataasa sinnerinut agguataarneqassasut, qaammammullu pisassat nungussagaluarpata aqutsiveqarfik matuneqassasoq, naalakkersuisoqarfik nalunaarpoq.

Kielsenip isornartorsiuisuni naaperiarpai

Sinerissamut qanittumi qaleralinniarneq Pingortitaleriffimmiit inassutigineqartunut ukiut sisamat ingerlaneranni  naapertuuttunngorsarniaritik, Naalakkersuisut siorna decembarimi nalunaarput.

Taamaammat Qeqertarsuup Tunuani 2019-imi qaleralittassat 2018-imi pisassiissutinut naleqqiullugit 1.320 tonsinik ikinnerupput.

AAMMA ATUARUK Siumukkormiut qaleralittassat allanngortikkusunngikkaat

Siumup Inatsisartuni gruppiani ilaasortat arfinillit Kim Kielsen tatigiunnaarlugu augustimi nalunaarput. Qeqertarsuup Tunuani qaleralittassat amerlineqarnerannik nalunaaruteqartoqarneratigut, Kim Kielsenip isornartorsiuisuni naaperiannguatsiarpai. 

Sinerissamut qanittumi qaleralinniarneq naalakkersuinikkut sammisaavoq aallassatitsisartoq. Nikkulaat Jeremiasen (S) qaleralinniarnermi aalisapiluttoqarneranik imminut assortuuttunik politikerinut tusagassiorfinnullu nassuiaateqarsimanerarluni isornartorsiorneqareerluni, aalisarnermut naalakkersuisuunerminiit upernaaq tunuarpoq.

Jens Immanuelsen (S) suliami tassani maanna naaakkeersuisuuvoq.