Qaleralittassiissutit uumassusilerisut inassutigisaannut naleqqussarniaraat

Aqutsiveqarfinnili marlunni aappaagumut qaleralittassiissutit ikilisinneqaraluartut uumassusilerisut inassutigisaannit suli amerlanerungaatsiarput.

Qaleralittassiissutit uumassusilerisut inassutigisaannut ukiuni tulliuttuni sisamani naleqqussarneqarnissaat Naalakkersuisunit aalajangiunneqartoq, tusagassiorfinnut nalunaarummi pingasunngornermi nassiunneqartumi ilisimatitsissutigineqarpoq.

Aqutsiveqarfimmi Qeqertarsuup Tunuani aappaagumut qaleralittassiissutigineqartut 8.180 tonsiupput. Uumassusilerisut inassutigisaat 5.120 tonsiugaluarput.

Aqutsiveqarfimmi Uummannami aappaagumut qaleralittassiissutigineqartut 9.500 tonsiupput. Uumassusilerisut inassutigisaat 5.800 tonsiugaluarput.

Qaleralinniarneq 2017-imi kinguariarfiungaatsiartoq

Kiisalu aqutsiveqarfimmi Upernavimmi aappaagumut qaleralittassiissutigineqartut 8.575 tonsiupput. Uumassusilerisullu inassutigisaat 5.330 tonsiugaluarput.

Taamaammat aqutsiveqarfinnut marlunnut qaleralittassiissutit ikilisinneqaraluartut uumassusilerisut inassutigisaannit suli amerlanerungaarsiarput.

Sinerissap qanittuani qaleralinniarneq nuna tamakkerlugu siorna 20 procentinik kinguariarfivoq. Qeqertarsuullu Tunuani ingasannerpaavoq, tamaani qaleralinniarneq 40 procentinik kinguariarfiummat.

2018-imulli kisitsisaatigineqarallartut takutippaat Qeqertarsuup Tunuani qaleralinniarneq siuariartorfiusoq.

Qaleralinniarnerup kinguariarfiunera assigiinngitsunik isumaqarfigineqarpoq, Pinngortitaleriffimili ilisimasallit naapertorlugit qalerallit tamaani pisarineqartartut ukiuni kingullerni qulini milliartuinnarsimapput, tamannalu aalisarneqarpallaarnerinut ersiutaasoq.

Ikinnerusunik qaleralittassiisoqarnissaa inassutigineqaraluartoq pisassiissutit maanna atuuttut attatiinnarnissaat Siumup Inatsisartuni gruppiata Naalakkersuisunut novembarip qaammataani kaammattuutigaa.