Tunisisut ikilinerat Great Greenlandimut ilungersuarnartorsiortitsisoq
Great Greenland tarrallataanngitsumik siorna rekortiliivoq. Ingerlatseqatigiiffik ukiuni 36-ini ingerlanermini aatsaat taamak puisit amiinik tunisassiorfianut Qaqortumiittumut annguttukitsigaaq.
Nunatta Naatsorsueqqissaartarfiata naatsorsuinerup inerneri saqqummiummagit, 2019-imiit 2020-mut tunisat 18 procentimik ikileriarput. Ammit 5070-it pineqarput, puisit amii 23.138 siorna nassiunneqarput.
Tamanna Great Greenlandip pisortaanut, Preben Møllerimut, ernumatitsivoq.
- Amernik 2020-imi tunisineq ataatsimut isigalugu kinguariangaatsiarpoq, suliffeqarfimmullu 2021-mut sunniutai tunisassiornitsinnut eqquingaatsiartussaassooq. Amernik tunisinerup kinguariarujussuarnera uggornarpoq, taanna oqarpoq.
AAMMA ATUARUK Great Greenland puisip amiinik amigaateqartoq: Suliniutit arlallit aallartilerput
Great Greenland maannamut naatsorsukkat malillugit qaammatip tulliani amernik uninngasuutaarutissaaq. Ingerlatseqatigiiffilli sapaatit akunnerini pingasuni matoqqassasoq, matoqqaneranilu amminik tunniussisoqarluarumaartoq neriulluni Preben Møller oqaluttuarpoq, taamaalilluni tunisassiorfik sivisunerusumik matoqqasariaqassanngimmat.
Piniartut aalisartunngortut
Great Greenland amminik 30.133-inik siorna pissarsinissamut Namminersorlutik Oqartussanut isumaqatigiissuteqarpoq. Taakkuli tunisassiornermi angoqqajarneqanngillat. Tunisat ikiligaluttuinnarnerat ingerlatseqatigiiffimmi pisortat paasiniarsimavaat.
- Amernik 2020-imi appariarneranut paasissutissanik ujartuisimavugut, apeqquteqarlutalu sooq taama appasitsiginersoq, takusinnaagatsigu natsiunerusut appariarsimasut, paasissutissanilli annerusumik akissuteqartoqarsimanngilaq, sooq natsernik tunisinerup appariarujussuarsimaneranik, Preben Møller oqarpoq.
AAMMA ATUARUK Aalisakkanik avammut tunisineq aalisagaqannginneruneranik akillu appariartorneranit eqqugaasoq
Akissullu tassaalluarsinnaavoq aalisakkat ukiuni kingullerni akigissaarnerulernerat.
- Ukiuni kingullerni paasisimasarput ima ippoq; Amerlanerusut aalisarnermut ikaarsaarsimapput. Puisinniarnermik inuussutissarsiuteqarnikut ilaatigut aalisarnermut nuussimapput.
Suliniutit nutaat
Pisortaq naapertorlugu puisit amiisa akii aalisakkat akiinut malinnaapput. Taakkumi akitsorput aatsaallu taama akigissaartigalutik.
Tamannali aalisartut aalisaratik puisinniarnissaannut naammanngilaq. Taamaattumik Great Greenland tunitsivinnik amerlanerusunik sinerissami ammaavoq.
AAMMA ATUARUK Jim Lyngvild Great Greenlandip atisaliaanik nittarsaassivoq
- Puisit amiinik tunisineq ingerlalluaqqilissappat suleqatigiinneq pisariaqarpoq. Uanilu tassa kommunit annerusumillu Pilersuisoq, Pilersuisormi sinerissami illoqarfinni nunaqarfinnilu annertungaatsiartumik inissisimammat.
Coronap aalisakkat akiinut ilungersunartorsiortitsinera Great Greenlandimut siuariaataasussatut isikkoqarpoq. Saarulliit raajallu akii appangaatsiartut puisit amiisa akii qaffakkaluttuinnarput.
- Maaji juunilu qiviaraanni amernik tunisineq qaffariarujussuarsimavoq. Allattukkagut eqqarsaatigissagaanni qaammatini tullerni tunisinerup qaffakkaluttuinnarnissaa neriunarpoq, pisortaq oqarpoq.
Maannakkorpiaq tunisineq siorna piffissap taamaalineranut sanilliullugu annertuneruvoq, ukiullu sinnera taamaakkumaartoq Preben Møllerip neriuutigaa.