Great Greenland puisip amiinik amigaateqartoq: Suliniutit arlallit aallartilerput
Great Greenlandip ukiumut anguniakkaminik angusaqarnissaanut puisit amii amerlaqisut amikkittoorutaaniarput.
Maannakkorpiaq ammit 10.000-it missaat amigaataapput, ukiullu sinnerani puisit taama amerlatigisut pisarineqarnissaat qularnarluni.
AAMMA ATUARUK Indhandlingspriser på sælskind på plads
Great Greenland amernik amerlaneroqisunik pisisussaqaraluarpoq, pisortaq Preben Møller oqaluttuarpoq.
- Assersuutigalugu pisiniussisartoq ataaseq amernik 30.000-inik piserusuppoq, Preben Møller KNR-mut oqarpoq.
Anguniagaanikuuvoq ukiumut ammit 30.000-it pisiarinissaat. Maannamut taamaallaat puisit amii 20.510-t tunisaasimapput, Great Greenland-illu naatsorsuutigaa ukiup naanissaanut piniartut ammit 1.000-it tunisinnaagaat.
• Natsiit amii, 70 cm inorlugu: 275 kr.
•Natsiit amii, 70 cm qaangerlugu: 300 kr.
• Aataat amii: 400 kr.
2019-imi naalakkersuisut, KNAPK-p aamma Great Greenland-ip puisit amiisaa akii nutaat pillugit isumaqatigiissut atsiorpaat.
Tamatumani ammerivik ukiumut 20,3 millioner koruuninik Namminersorlutik Oqartussanit piniartunit amernik pisiortornissaminut tapiiffigineqarpoq.
Taamaaliornikkut qularnaarumaneqarpoq Great Greenlandimut amernik tunisaqartarnerup annertusarnissaa patajaallisarnissaalu, tamannali kissaatigineqartutut sunniuteqarsimarpasinngilaq.
Sullissinissamik isumaqatigiissut nutaaq suliarineqartoq
Naalakkersuisut piniartut atugarisaat isiginiarpaat. Inuussutissarsiornermut naalakkersuisoq Jens-Frederik Nielsen (D), sapaatip-akunnerisa marluk matuma siorna Inatsisartut Inuussutissarsiornermut, Piniarnermut, Nunalerinermullu Ataatsimiititaliaannik isumasioqateqarpoq.
Tassani saqqummiuppaa 2021-mut puisit amiinik tunisisarnermut tunngatillugu sullissinissamik nutaamik isumaqatigiinniartoqartoq.
Siunissami periarfissanik nutaanik pilersitsinissaq siunertaralugu Nuummi, Ilulissani Qaanaamilu tunitsivissat nutaat ammarneqarniarput.
AAMMA ATUARUK Puisip amii tunisat ikileriangaatsiarput
Ilutigisaanik tunitsivinni toqqorsivissat inissallu, ilaatigut imermik kuuinnartoqarnissaanik pisortat pissarsiarinissaat piviusunngortitsisinnaasunik pissarsiniarneq ajornartorsiutaasimavoq. Tamatuma saniatigut amernik tigooraasut nutaat atorfinitsinneqarnissaat sulissutigineqarpoq, naalakkersuisullu amernik tigooraasut pitsaanerusumik akissarsiaqartinneqarnissaat misissorlugu.
Isumasioqatigiinnermi Jens-Frederik Nielsenip illoqarfinni aalajangersimasuni annertunerusumik amernut tapiissuteqartarnissaq itigartippaa, tammanna assigiinngisitsinerussammat.
