Puisit amiinut akigititassat isumaqatigiissutaasut
Atsioqataasullu tamarmik isumaqatigiissut iluarisimaarpaat, taannami puisit amiinik amerlanernik tunisisoqartalernissaanik kinguneqarnissaa ilimagineqarmat.
• Natsiit 70 cm-it inorlugit angissusillit, 275 kr.
• Natsiit 70 cm-it sinnerlugit angissusillit, 300 kr.
• Aataat, 400 kr.
- Tunisinermi akigititanik qaffasinnerusunik isumaqatigiissut nutaaq aqqutigalugu qularnaarisimanerput assut iluarisimaarpara. Tamatuminnga tunngaveqarluta Great Greenland A/S amernik amerlanernik pissarsisinnaassasoq neriuutigaara, Inuussutissarsiornermut Naalakkersuisoq Aqqalu Jerimiassen oqarpoq.
KNAPK-p siulittaasuata naalakkersuisoq isumaqatigaa. Akit qaffasinninngorpata amernik tunisisarnerit amerlanerulernissaat Henrik Sandgreenip aamma ilimanaateqarnerarlugu.
Great Greenland A/S-ip siulersuisuini siulittaasup Juliane Henningsenip isumaqatigiissut aamma nersualaarpaa.
- Great Greenland A/S-imiit isumaqatigiissut iluarisimaarparput, maannakkummi takuarput puisit amii piumaneqartorujussuusut. Taamaattumik tunitsivinnik amerlanernik ammaassaagut akillu qaffaavigivagut. Taamatullu nunat tamalaat akornanni, kalaallit piniariaasiat piujuartitsineq aallaavigalugu ingerlanneqartoq paasititsiniutigalugu nangittumik siammartissavarput, Juliane Henningsen oqarpoq.
Maajip aallaqqaataani 2019-imi qaammatini sisamani siullerni tunisanik nalilersuissasut illuatungeriit isumaqatigiissutigaat, tunisisimaneq naapertorlugu ukiup sinneranut isumaqatigiissutip naleqqussarnissaa tassani siunertarineqarluni.
