Toqutsinermut suliaq paasisaqarfiunerusoq
Ilulissani toqutsisoqarsimanernut suliamut tunngatillugu Ilulissani eqqartuussivimmi ippassaq angut arnarlu killisiorneqarput.
Angut novembarip tallimaata tungaanut, arnarlu akunnerni 72-inik politiinit tigummigallarneqassapput.
AAMMA ATUARUK Politiit: Qulaajarluinnalerparput
- Inuit marluk tigusarigatsigit suliaq naammagisimaarparput, taamaalilluta misissuineq ukkannerusinnaalerparput, politiit misissueqqissaartartut pisortaat, Jan Lambertsen KNR-imut ippassaq oqarpoq.
Politiit suliartik qulaarluinnaleraat
Taakku ippassaq arfininngornermi Ilulissat eqqartuussiviani nalunaaqutaq pingasunut sassartinneqarput. Killisiuereernerup kingorna politiit suli oqaaseqarsinnaanngikkallarnerarput, ullumili sapaammi sukumiinerusumik saqqummiussisinnaallutik tusagassiuutinut nalunaarumminni allapput.
Suliaq ingerlanneqarmat politiit annertunerusumik oqaaseqarsinnaanngikkallarput.
Suna peqqutaalluni angut toqutaasimanersoq politiit aperigaluarpagut oqaaseqarsinnaanngikkallarpulli. Toqutsisimasutullu tigusarineqartut unnerluunneqarnerminnut qanoq isummernersut aamma oqaatigerusunngikkallarpaat.
Suli kinaassusersineqanngitsoq
Toqutaasup kinaanera ilisimaneqartoq KNR-ip Sermitsiaq.AG-llu innuttaasunit tusarpaat. Tamannalu pillugu politiit itinerusumik oqaaseqarusunngillat.
Pinerlineqarsimasumut atatillugu, kinaanera 100 procentimik eqqortumik paaserusukkaluarparput, kisiannili sananeqaatai DNA-t misissorneqareertinnagit kinaanersoq eqqartuussivimmi saqqummiunneqarsinnaasumik qularnaavissorlugu oqaatigisinnaanngilarput.
