Tasiilami napparsimmavimmi sulisut allaasersorfigineqartut
Ataasinngornerup oktobarip 31-ata novembarillu aallaqqaataata unnuaani angut 20-t missaannik ukiulik Tasiilami napparsimmavimmut qorortuulerluni takkuppoq sulisullu qorortuumik siorasaarlugit.
Sulisut napparsimmaviup immikkoortortaqarfiata ilaannut qimaallutik mattuttariaqarsimallutik.
Angutip siorasaarinera pillugu politiit unnuaq nalunaaqutaq 2.45-ip missaani kalerrinneqarput,
politiit angut ujaaraat, napparsimmaviullu silataani kælderimut aqqummi qorortuulerluni sinittoq tigusaraat, inuunermillu navianartorsiortitsisutut unnerluunneqarluni.
Aallaat imassaqartoq
Politiit naapertorlugit, angut inuttut atukkani pillugit pakatsisimalluni nassuiaavoq, inunnillu akornusiinissaminik eqqarsaateqarnani taamaallaat sulisunik ersiortitserusussimavoq.
Qoorortooq politiinit misissorneqarmat paasineqarpoq qorortooq imassaqartoq igeriaannaasimanngitsorli.
Pisoqarnerata nalaani aallaamik eqqartoqanngilaq inunnillu ajoqusertoqarani.
Sermersuup Tasiilami politiivinit Henrik Madsen taama paasissutissiivoq.
