Takornariaqarnermut siunnersortit silaannaap pissusaa pillugu isumaqatigiissummut: Iliuuseqartoqarnera iluarpoq
Sapaatip akunnerani kingullermi silaannaap pissusaa pillugu FNip politikerinik nuimasunik ataatsimiititsinerani Naalakkersuisut siulittaasuata Kalaallit Nunaata Parisimi isumaqatigiissummut peqataanissaa naqissusermagu, takornarialerisut iluarusuutigaat.
Isumaqatigiissummi gassit nunarsuatsinni silaannarmik kissakkiartortitsisunik aniatitsineq appartinniarneqarpoq, silaannaap pissusaata allanngorarneri killilersimaarniarlugit.
- Iliuuseqartoqarnera iluarpoq. Siunissami silap pissusaanut tunngasut politikkikkut iliuuseqarfigineqarusunnerat takutinneqarpoq. Tamannalu piujuartitsiniarnermut atatillugu naleqqulluni, Hlif Linnetved Visit Greenlandimi piujuartitsinermut atatillugu pisortaq oqarpoq.
AAMMA ATUARUK Kalaallit Nunaat Parisimi isumaqatigiissummi silap pissusia pillugu piumasaqaammi ilaanngitsoq
Nunatsinnili takornariaqarnermi siunnersortit Kalaallit Nunaannut takornariat amerliartornissaat isumagisassaraat.
Tamanna qanoq ililluni silap pissusaata allanngoriartorneranut naleqquttuussava?
- Kalaallit Nunaat timmisartorluni takornariagassaanngilaq – umiarsuarnik takornariaanngikkaanni. Taamaakkaluartoq takornariarfissatut pissutsit sapinngisamik piujuartitsinermik anguniagaqarlunissaq ajornanngilaq, Hlif Linnetved oqarpoq nangillunilu:
- Takornariat amerlisarusuppagut, taamaakkaluartorli tamatuma qanoq anguneqarnissaa eqqumaffigerusupparput.
Plastikki atorunnaamillugu seqerngup qinngornera atorluarnerullugu
Taassuma nassuiarpaa, takornariaqarnerup piujuartitsinermut maanna naleqqussarneqarpoq, ataatsimullu periusissatut pilersaarusiortoqaruni.
Takornarialerisut tamarmik immikkut mingutsitsinnginnissamik eqqarsaateqartut taassuma eqqaavai.
- Plastikkimik sanaat ataasiaanagassat kiisalu immaqa angalanermi orsussamik atuinikinnissaq imaluunniit illuaqqani seqerngup qinngornera atorluarlugu nukissiorneq iluaqutaasinnaapput. Pissutsit assigiinngitsut katillutik takornariaqarnerup piujuartitsilluni ingerlanneqarneri tamatumunnga tapertaasinnaapput, Hlif Linnetved oqarpoq.
AAMMA ATUARUK Múte B. Egede Parisimi isumaqatigiissummut ilaalernissaq pillugu: Aningaasarsiornikkut nutaanik periarfissiissaaaq
Kalaallit Nunaat Parisimi isumaqatigiissummut peqataasinnaanera Inatsisartuni suliarineqarlunilu aalajangiiffiginqassaaq.
Kalaallit Nunaat silaannaap pissusaa pillugu isumaqatigiissummut peaqataalissappat, aalajangersimasumik CO2-mik aniatitsisoqartariaqanngilaq.
