Naalakkersuisut Parisimi isumaqatigiissummut atsiortut
Nunarput Parisimi isumaqatigiissummut ilaalissaaq.
Nunanut allanut tunngasunut, silap pissusianut Naalakkersuisoq aamma Naalakkersuisunut siulittaasoq, Múte B. Egede (IA) aamma avatangiisinut naalakkersuisoq, Kalistat Lund (IA) silap pissusia pillugu ataatsimeersuarnermut COP26-mut peqataapput.
Ataatsimeersuarneq Skotlandimi Glasgowimi ingerlanneqarpoq. Naalakkersuisullu Nunatta Naalagaaffiit Peqatigiit silap pissusia pillugu isumaqatigiissutaannut ilaalernissaa tassani ataasinngornermi aalajangerpaat.
- Tulluusimaarutigaara Naalakkersuisut Parisimi isumaqatigiissummut peqataalissallutik aalajangersinnaammata. Maanna danskit naalakkersuisui nalunaarfigisinnaalerpakka Parisimi isumaqatigiissummut peqataalernissap atortussanngortinneqarnissaanik sulineq Inatsisartunut tunniunneqarumaartoq, Naalakkersuisut siulittaasuat, Muté Borup Egede oqarpoq, nangillunilu:
- Nunat issittumiittut silap kissakkiartuinnarneranik malunnaateqarfiunerpaat ilagaat, Naalakkersuisuniillu isumaqarpugut akisussaaffiup ilaanik kivitseqataasariaqarluta.
AAMMA ATUARUK Naalakkersuisut Skotlandimi silap pissusia pillugu ataatsimeersuarnermi peqataassasut
Múte B. Egedep taamaalilluni Inuit Ataqatigiit Parisimi Isumaqatigiissummut ilaalernissaanut qineqqusaarnermi neriorsuutaannik eqquutsitsivoq.
Parisimi isumaqatigiissut nunat tamalaat akornanni silap pissusiata allanngoriartorneranik killiliiniarnissaq pillugu inatsisitigut pituttuisuuvoq.
Nunarsuarmi tamarmi silaannaap 2 grademik 1800-kkut qiteqqunnerata nalaanit kissannerunnginnissaa anguniagaavoq.
Tamatumalu anguniarnissaanut nunat suliffissuaqarnernit aniatitsinernik annikillisaanissamut anguniagassaqarput.
Nunatta isumaqatigiissummut ilanngunnissaq siusinnerusukkut itigartitsissutiginikuuaa, Naalakkersuisuusimasummi Siumumit siuttuuffigineqartut isumaqatigiissut nunatta ineriartitsiviunissaanut akunnattoorfeqartitsissasoraat.
