Naalakkersuisut Skotlandimi silap pissusia pillugu ataatsimeersuarnermi peqataassasut
Naalagaaffiit Peqatigiit silap pissusia pillugu ataatsimeersuarnerat, COP26 sapaatiuppat aallartissaaq. Ataatsimeersuarneq Skotlandimi Glasgowimi ingerlanneqassaaq.
Ataatsimeersuarni naalagaaffiit naalakkersuisullu siulittaasui 100-nit amerlanerusut ammaanersiornermi novembarip ulluisa aallaqqaataanni aappaanilu peqataassapput. Tamatuma saniatigut ministerit atorfillillu nunanit 195-ineersut kiisalu inuussutissarsiortut, suliniaqatigiiffinnit naalakkersuisunut atassuteqanngitsunit sinniisut tusagassiortullu aamma peqataassapput.
Nunarput aamma peqataassaaq. Nunanut allanut tunngasunut, silap pissusianut Naalakkersuisoq Naalakkersuisullu siulittaasuat, Múte B. Egede aamma avatangiisinut Naalakkersuisoq Kalistat Lund (IA) ataatsimeersuaqataassapput.
AAMMA ATUARUK Vittus: Silap pissusia pillugu isumaqatigiissut Nunatsinnut pitsaasuunngilaq
Nunarsuarmi silaannaap kissatsikkiartorneranik annikillisaanissaq silap pissusia pillugu ataatsimeersuarnerup siunertaraa. Nunat assigiinngitsut Parisimi isumaqatigiissummik taaneqartartoq 2015-imi isumaqatigiissutigaat. Taanna CO2-mik aniatitsinerup annikillisarneranik suliniuteqarnissamut nunat akornanni isumaqatigiissutaavoq.
Kalaallit Nunaat isumaqatigiissummut ilaanissaminik taamani itigartitsivoq. Tamanna Kalaallit Nunaata siunissami aningaasaqarnikkut ineriartortitsinissaanut killiliissasoq Naalakkersuisuusimasoq tunngavilersuutiginikuuaat.
- Nangaassuteqarnermut aallaaviuvoq nunatta inuussutissarsiornikkut siunissami aningaasarsiornikkullu ineriartornissaanut nunatta killiliiffigineqarnissaa taanna kissaatiginnginnatsigu, Inuussutissarsiornermut, Suliffeqarnermut, Niuernermut Nunanullu allanut naalakkersuisuusimasoq, Vittus Qujaukitsoq taamani oqarpoq.
IA Parisimi isumaqatigiissumut ilaalerusuttoq
Inuit Ataqatigiilli isumaqatigiissummut ilanngutititserusupput.
Múte B. Egede Inatsisartunut qinersisoqarnerata nalaani KNR-imut oqarpoq:
- Inuit Ataqatigiinniit nunatta Parisimi isumaqatigiissummut ilanngunnissaa angorusupparput.
Siulittaasup tamanna Skotlandimi anguniarneraa suli nalunarpoq.
AAMMA ATUARUK IA silap pissusaata allanngoriartornera pillugu qineqqusaaruteqartoq: Nunarput Parisimi isumaqatigiissummut ilanngussaaq
Múte B. Egedep Glasgowimut angalanermini siunertariniagaa pillugu apersorniarnera maannamut suli iluatsinngilaq.
Inatsisartunut ilaasortap, Inuit Ataqatigiinneersup, Mariia Simonsenip Naalakkersuisut Parisimi isumaqatigiissummut ilanngunnissaq naatsorsuutigineraat aggusimi apeqqutigaa.
Tassanilu nunanut allanut tunngasunut silallu pissusianut naalakkersuisoq, Pele Broberg (Naleraq) ima akissuteqarpoq:
- Kalaallit Nunaat Parisimi isumaqatigiissummut qaqugu ilanngutissanersoq ilanngutissanersorlu Naalakkersuisunit suli inaarutaasumik isummerfigineqanngilaq. Parisimut isumaqatigiissummut ilanngutissagutta kingunerisinnaasaat pillugit nalilersuineq Naalakkersuisut aallartereerpaat.