IA silap pissusaata allanngoriartornera pillugu qineqqusaaruteqartoq: Nunarput Parisimi isumaqatigiissummut ilanngussaaq

Silap pissusaata allanngoriartornerata sunniutissai inuunitsinnut sunniuteqarsinnaagamik piareersimaffiginerusariaqarpagut. Inuit Ataqatigiit taama isumaqarput.

Sunniuteqarnerusinnaaniassagattalu Parisimi isumaqatigiissummut ilannguttariaqartugut, partiimit isumaqarput.

Inuit Ataqatigiit silap pissusaata allanngoriartorneranut politikkikkut piareersarnerunissamik qineqqusaaruteqarniartut partiip siulittaasuata paasissutissiissutigaa.

- Silap pissusaata allanngoriartornerata nunatsinni inuussutissarsiornikkut tunngavitsinnut, tassalu uumassusilinnik inuuniuteqarnitsinnut sunniuteqarsinnaanera piareersimaffigisariaqarparput, Múte B. Egede oqarpoq.

Silap pissusaata allanngoriartornera Issittumi malugineqarnerpaasinnaavoq.

Sulili malunnarnerulersinnaavoq, uumasullu allat nunatsinnut siunissami anngussinnaassapput, maannalu uumasunik inangiillutik.

Silalli pissusaata allanngoriartornera aamma periarfissaqartitsisinnaassaaq. Ilaatigut Sullualummi umiartortoqarnerusinnaanngussammat, nunatta imartaani umiarsuaqarnerulersinnaassaaq.

Nunatta tamakku piareersimaffigisariaqarai, Inuit Ataqatigiit isumaqarput. Taamaattoqassappallu pilersaarusiortoqartariaqarpoq.

- Silap pissusaata allanngoriartorneranuttaaq pissutsit unammilligassallu takkuttussat nunatta politikkeqarfigalugulu ersarissumik ingerlatsiviginissaanut aamma imaqassapput, Múte B. Egede oqarpoq.

Nunat tamalaat akornanni tusaaneqarnerussasugut

Aamma nunat tamalaat akornanni tusaaneqarnerusariaqartugut, taanna isumaqarpoq.

Nunat tamalaat akornanni silap pissusaata allanngoriartornera pillugu suleqatigiinnerni, soorlu Parisimi isumaqatigiissummut ilanngunnikkut tusaaneqarnerusinnaassaagut.

2015-imi isumaqatigiittoqarpoq, nunalli inoqqaavisa aningaasaqarnikkut ineriartornissamut pisinnaatitaaffiat isumaqatigiissummi ilaanngimmat taamani Naalakkersuisut ilaannginnissamik aalajangerput.

Allamilli aalajangertoqartariaqalersoq, Múte B. Egede isumaqarpoq.

- Inuit Ataqatigiinniit nunatta Parisimi isumaqatigiissummut ilanngunnissaa angorusupparput, Múte B. Egede oqarpoq.

AAMMA ATUARUK Joe Bidenip USA Parisimi isumaqatigiissummut WHO-mullu ilannguteqikkaa

Silap pissusaa pillugu Parisimi isumaqatigiissut gassinik silaannarmik kissakkiartortitsisartunik aniatitsinerup nunarsuaq tamakkerlugu millisinnissaanik anguniagaqarfiuvoq, inatsisitigullu pisussaaffiliilluni.

Nunarsuarmi tamarmi silaannaap 2 grademik 1800-kkut qiteqqunnerata nalaanit kissannerunnginnissaa anguniagaavoq.

Tamaattoqarnissaanullu nunat isumaqatigiissummut ilaasut anguniagassaminnik aalajangiisassapput.