Múte B. Egede Parisimi isumaqatigiissummut ilaalernissaq pillugu: Aningaasarsiornikkut nutaanik periarfissiissaaaq

Kalaallit Nunaat Parisimi isumaqatigissumut peqataalernera   inuiaqatigiinni aningaasarsiornikkut ineriartormut akornusiisusaanngilaq.

Naalakkersuisut siulittaasuat KNR-imi Qanoruumi Taama qulakkeerinnilluni oqarpoq.

Kalaallit Nunaata Parisimi isumaqatigiissummut peqataaleruni aningaasarsiornikkut akornutaanani periarfissaqartitsilissasoq Múte B. Egede isumaqarpoq.

- Parisimi isumaqatigiissummut peqatanissamut siunnerfiliineq aamma periarfissanik nutaanik ammaasussaavoq, anignaasarsiorfissanik nutaanik inuussutissarsiornikkullu ineriartorfissatsinnik,  taanna oqarpoq.

Parisimi isumaqatigiissumut Kalaallit Nunaata ilanngunnissaa pillugu Siumumit Demokraatiniillu isornarsiusoqarnerata kingorna taama oqarpoq.

Naalakkersuisut siulittaasuta nalunaaruteqarnerata kingninngua  illuatungiliuttut partiivi isornartorsiuteqarput.

Isumaqatigiissummummi Kalaallit Nunaata peqataaleraneratigut inuussutissarsititigut ineriartornerup akornuserneqarnissaa ernumassutigigamikku:

- Dundasip eqqaani Moriusami Titaniumimik piianissaq eqqarsaatigissagutsigu, taakkua piianerminni,  CO2 -mik annertuumik aniatsitsisariaqartussaapput  solari annertooq atortussaagamikku, Demokraatit siulittaasuat Jens-Frederik Nielsen ataasinngornermi oqarpoq. 

Siumumiilli ersarissuliornerupput.

- Siunniussarput akimorlugu  taamatut pituttortoqalersimanera akuerinngilluinnarparput, Siumut sinnerlugu Jess Svane oqarpoq.

Erngup nukingata tuniniarnissa periarfissaavoq

Kalaallit Nunaat Parisimi isumaqatigiissummut ilanngunnermigut  CO2-mik aniatitsinermik annikillisaaniarnissamut piumasaqaateqarfiulinngilaq.

Tamanna nunattalu isumaqatigiissummi ilaalernissaanut qulaajaanermi nutaamik takutinneqarpoq. Tamanna Naalakkersuisut ataasinngornermi nalunaarutigaat.

Tamanna Parisimi isumaqatigiissummut ilanngunnissamut aningaasarsiornikkut  akornutaanani periarfissaalernissaa Múte B. Egedep naatsorsuutigaa.

- Annertuumik siuarsimareernerput aamma atorluarlugu, suli imeq nukissiuutitut atorluarsimasarput nunatsinni ukiunilu aggersuni suli ineriartortitarput, nunarsuarmioqatitsinnut  tuniniarlugulu aningaasarsiorfittut i periarfissatut ineriartortitassatut isigivarput, taamaattumik inuussutissarsiornikkut aporfiinnarnik pilersitsinani periarfissanik nutaanik pilersitsissaaq inuiaat kalaallit atugarissaalernissaanik  aamma ilaqutaalersinnaassaaq, Múte Bourup Egede oqarpoq.

Kalaallit Nunaat isumaqatigiissummut ilanngutsinnanni, silaannarmut mingutitsinerup annikillisinneqarnissaa pillugu Inatsisartut aalajangertussaaput.

- Siunnerfigivarput upernaaq manna imaluunniit kingusinnerpaamik ukiaru 2022-mi suliarineqarluni tamanna naammassineqassasoq.