Lektori naliliivoq: Parisimi isumaqatigiissut aatsitassarsiornermut periarfissakinnerulersitsisinnaavoq

Nunarput silap pissusaa pillugu Parisimi isumaqatigiissummut ilanngukkaluarluni aatitassarsiorsinnaavoq allanilluunnik inuussutissarsiorsinnaalluni.

Aamma tamakkua gassinik silamik kissatsikkiartortitsisunik aniatitsinerulissutaagaluarpataluunniit.

AAMMA ATUARUK Illuatungiliuttut Parisimi isumaqatigiissut pillugu kamattut: Namminiilivikkiartornermut innarliissaaq

Inuussutissarsiuutilli ataavartumik nukissiuutinik atuinerunissaat naalakkersuinikkut siuarsarneqartariaqassaaq.

Taamaalillunilu killilersuuteqarnerulissaaq, nunaniillu allanit aningaasaliiniartunut nangaanarnerulersinnaalluni.

Ilisimatusarfimmi Inuiaqatigiilerinermut aningaasarsiornermullu tunngasunut lektori, Javier Arnault taama oqarpoq.

- Nunarpassuit ingerlatseqatigiiffinnut aamma pilerinarput. Kalaallit Nunaanni killilersuisoqarnerulerpat, tamanna nunani allani ingerlatseqatigiiffiit aningaasaliinissaannut sunniuteqarnerlussinnaavoq, Javier Anaut oqarpoq.

Nunarpulli Parisimi isumaqatigiissummut ilanngukkaluarluni inuussutissarsiutinik suli ineriartortitsisinnaasoq, taassuma erseqqissaatigaa.

- Kalaallit Nunaat mikisumik suli inuussutissarsiorfiuvoq, tunisassiorninilu suli allilersinnaallugu. Qangatulli tunisassiorneq tunulliutilerlugu attanneqarsinnaasumik ingerlasumik inuussutissarsiornissaq pingaarnerulissaaq. Tassani aalisarneq, aatsitassarsiorneq nioqqutissiorneq pineqarput. Isumalluutit attanneqarsinnaasumik atortarnissaannut pikkoriffigineqarnerusariaqassaaq, Javier Anaut oqarpoq.

Isertitassat mingutsitsinnginnerunissarlu akunnattoorfeqartoq

Nunat tamalaat akornannit timmisartuussinerit umiartornerillu gassimik nunatsinni aniatitsinerpaasunut ilaapput. Nunarpulli taakkununnga iliuuseqarnissamut Parisimi isumaqatigiissummut ilanngunnermini pisussaaffilerneqanngitsoq, Javier Anautip erseqqissaatigaa.

Nunarput aamma politikkikkut suliniutinut arlalinnut soorlu imermik nukissiorfeqarnerulernissap sulissutigineqarneranut innersuussisinnaavoq.

Parisimili isumaqatigiissummut ilanngunneq nunatsinnut suli pisussaaffiliivoq. Nunatsinnut isertitsissutaasorujussuusinnaasut nunanullu tamalaanut pisussaaffiit nalilersuinermi oqimaaqatigiissinniarnissaat ajornakusoorsinnaavoq.

AAMMA ATUARUK Kalaallit Nunaat Parisimi isumaqatigiissummi silap pissusia pillugu piumasaqaammi ilaanngitsoq

Parisimimi isumaqatigiissummut ilanngunneq gassimik silamik kissatsikkiartortitsisartunik aniatitsinerup minnerpaaffianiitinniarnissaanut politikkikkut suliaqarnissamik pisussaaffiliivoq. Aatsitassarsiorfiit imermit nukissiorfinnit sapinngisamik pilersorneqarnissaat assersuutaasinnaasoq, Javier Anaut oqarpoq.

- Nukissiuutit ataavartut isertitaqarfiulluarsinnaasunik inuussutissarsiuuteqarnerani siuarsarneqarniarput, tamannalu akunnattoorutaasinnaavoq. Qanoq iliortarnissaq, suliaqarfiillu assigiinngitsut ataavartumik nukissiuutinik atuinissaannut iliuuseqarnissaq immaqa isumaliuutigineqartariaqarsinnaassapput, Javier Anaut oqarpoq.

Nunarput Parisimi isumaqatigiissummut pisortatigoortumik ilanngunnissaa Inatsisartunit suliarineqaqqaarlunilu akuerineqassaaq.