Illuatungiliuttut Parisimi isumaqatigiissut pillugu kamattut: Namminiilivikkiartornermut innarliissaaq

Parisimi isumaqatigiissummut Naalakkersuisut marluk Glasgowimi peqataanerminni silaannarmut mingutsitsinnginnissaq pillugu inatsisitigut pituttuisumik atsioqataanerat nunatta Namminiilivikkiartorneranut akornusiissasoq, Siumut Demokraatillu isumaqarput.

AAMMA ATUARUK Naalakkersuisut Parisimi isumaqatigiissummut atsiortut

Naalakkersuisummi maannakkut siuttuusut aalajangerput nunarput Naalagaaffiit Peqatigiit isumaqatigiissutaannut - Parisimi isumaqatigiissummut peqataassasoq.

Nunarsuarmiut tamarmik COP26-mik qulequtalimmi tusagassiutini katersortitsineranni IA-meersoq Naalakkersuisusut siulittaasuat aammalu nunanut allanut silaannaallu pissusia pillugu Naalakkersuisuusoq Múte B. Egede sassarpoq nalunaarutigalugulu nunarput isumaqatigiissummut peqataassasoq.

Jens-Frederik Nielsen: Ernumanartutut nalilerusuppara

Tamanna politikkikkut illuatungiliuttunut puffaammertitsivoq, taakkumi annilaanngatigaat, Parisimi isumaqatigiissummut nunatta atsiornera Kalaallit Nunaata aningaasarsiornikkut ineriartornissaanut akornusiingaatsiartussanngussasoq.

- Soorunami ernumanartutut nalilerusuppara, siullermik ilisimanngilara sunarpiaq atsiorsimaneraat, ilisimanngilara nunarput arlaannaannulluunniit maannakkut pituttornersoq, pingaarnertullu ilisimanngilara soorlu aamma inuiaqatigiit sinnerisa aamma suli ilisimanngikkaat siunissami nammineq ineriartornissarput maannakkut killilersornialerneraat, Jens Frederik Nielsen KNR-imut taama oqarpoq.

Jens Frederik Nielsen aperaarput sunarpiaq annilaanngatigineraa:

- Nunatsinni politikerit ukiorpassuarni taarseraattuartut anguniartuarpaat nunatta aningaasarsiornera taamaallaat aalisakkanik aallaaveqassanngitsoq, Jens Frederik Nielsen oqarpoq.

Siumumiit oqaaseqartartuusoq Jess Svane ima oqarpoq:

- Isumaqarpunga nunatta inuussutissarsioneranut aporfissat annersaat maannakkut atsiorneqartoq, uagut Siumumiit soorunami oqariartuutigissavarput inuiaqatigiit kalaallit apereqqaarnagit nunarsuarmioqatigiinnut pituttornerat uagut akuerisinnaanngilarput, Jess Svane KNR-imut taama oqarpoq.

- Nunarput suliffissuaqarnikkut aatsaat ineriartornissaminut aallarteruttorpoq, Parisimi isumaqatigiissut annertoorujorujussuarmik silaannarmut mingutsitsinaveersaarnermut killiliisussaavoq. Nunallu pisuut aallaqqaataaniilli atsioqatigiinnerivaat oqartariaqarpugullu namminneq ingerlaqqinnissaminnut akissaqalereersimanertik tunngavigalugu massakkut kikkut tamaasa mattussornialerpaat, Jess Svane oqarpoq.

Aatsitassarsiorneq ingerlallualerpat pinngitsoorani mingutsitsisoqartariaqartoq demokraatit oqarput Moriusallu eqqaani aatsitassarsiortoqarnissaa assersuutigaa:

- Moriusap eqqaani aatsitassarsiortoqarnissaa IA-kkut akuersissutigisaat pinngitsoorani CO2-mik aniatitsiffiussaaq aammalu solarimik atuiffiusussaalluni, taamaattumik maanna nunatta inuussutissarsiornikkut tunngatillugu nalorninartumut inissippoq, Jens Frederik Nielsen oqarpoq.

- Nunarput arlaatigut pisussaaffilersorluni qilersussappat Inatsisartut saneqqunneqarsinnaanngillat, taamaammat uagut sakkortunerpaamik uparuarparput inuiaqatigiit kalaallit tusarniarneqaqqaaratik aammalu Inatsisartuni assigiinngitsutigut oqaloqatigiinneq peqqaartinnagu nunarsuarmioqatigiit namminneq ineriartornissaminnut akissaqareertunut pituttorneqarnerat uagut Siumumiit akuerisinnaanngilarput, Jess Svane oqarpoq.

Naalakkersuisut tusagassiutinut nalunaarumminni erseqqissaatigaat nunarput CO2-mik mingutitsinaveersaartariaqassasoq.

Parisimilu isumaqatigiissut nunani tamalaaneersunit isumaqatigiissutaasoq inatsisitigut sakkortuumik pituttugaavoq.

Taamaammallu Naalakkersuisut uuliasiornissamut aasaq unitsitsipput, siunniunneqarporlu nukissiutit ataavartut atorlugit ingerlatsisoqassasoq.