Mette F-ip nunatta silap pissusianut isumaqatigiissummut ilaalerniarnera alloriarnertut pingaaruteqartutut isigaa

- Kalaallit Nunaata nunat tamalaat silap pissusaa pillugu Parisimi isumaqatigiissutaannut ilanngunniarnera ajunngilluinnarpoq, ministeriuneq oqarpoq.

Danmarkillu Kalaallit Nunaata isumaqatigiissummi anguniakkanik anguniagaqarneranik suleqatiginninnissani qilanaaraa.

Ministeriuneq, Mette Frederiksen (S) marlunngornermi oqarpoq.

- Naalagaaffeqatigiinnerup iluani alloriarneruvoq pingaarutilik, silallu pissusiata allanngoriartornerata akiorniarneqarnerani aamma pingaaruteqarluinnarluni.

- Kalaallit Nunaat silap pissusiata allanngoriartorneranit nunani eqqorneqarnerpaanut ilaavoq, Mette Frederiksen oqarpoq.

Kalaallit Nunaata Parisimi isumaqatigiissummut peqataannginnerata atorunnaarsinneqarnissaa, naalakkersuisut ataasinngornermi nalunaarutigaat.

AAMMA ATUARUK Kalaallit Nunaat Parisimi isumaqatigiissummi silap pissusia pillugu piumasaqaammi ilaanngitsoq

Kalaallit Nunaata Parisimi isumaqatigiissummut peqataannginnerata atorunnaarsinneqarnissaanut naalakkersuisut aalajangernerat Mette Frederiksenimut, nunat tamalaaat silap pissusia pillugu Skotlandimi Glasgowimi COP26-mi ataatsimeersuarnerisa nalaanni tunniussimallugu, naalakkersuisut siulittaasuata Múte B. Egedep tusagassiortunut sassarnermi ataasinngornermi oqaatigaa.

Kalaallit Nunaat silap pissusiata allanngoriartornera akiorniarlugu Parisimi isumaqatigiissummut peqataalersoq, taassuma oqaatigaa.

- Issittumi silap pissusiata allanngoriartornera nunarsuup sinneranit tamanit sukkanerusumik nalaapparput. Akisussaaffimmik tiguseqataaniarpugut, Múte B. Egede oqarpoq.

Nunatta nunat tamalaat akornanni silap pissusia pillugu isumaqatigiissummut pisortatigoortumik ilaalernissaanut ingerlatsinerit arlallit inisseqqaassapput. Tamannalu 2022-mi upernaakkut piariissasoq, Múte B. Egedep naatsorsuutigaa.

Tamatuma kingorna isumaqatigiissummi ilaasut 200-t missaanniittut 2015-imili iliuuserisaattut nunatsinni silap pissusianut anguniagaqalissaaq.