Immikkut ilisimasalik takornariartaassuaq ikkarleqqasoq pillugu: - Taama pisoqarnissaa ilimagineqareerpoq

Naqqiut: Ocean Explorerimi issimasunik qimagussuinermut aningaasartuutit nunatta oqartussaasuinut Danmarkillu naalagaaffianut toriaannaasut, siusinnerusukkut allappugut. Tamanna kukkunerummat allaaserisap immikkoortuata kingullersaanni naqqipparput.

Takornariartaassuaq Issittup ilarujussuata ilaani inuilaami ippassaq ikkarlimmat, amerlasuunit qangali aarlerigineqartarsimasoq pivoq. 

- Taama pisoqarnissaa ilimagineqareerpoq. Umiarsuimmi, ingammik takornariartaassuit, Kalaallit Nunaata imartaani Issittullu imartaani angallattut imaaginnavipput.

Umiarsuit naalagaat aamma Svendborgimi imarsiornermik ilinniarfimmi SIMAC-imi lektori, Philip Max Cossen, taama oqarpoq.

Takornariartaassuarmi Ittoqqortoormiit avannaani Alpefjordimi ataasinngormalli ikkarleqqasumi, tassa Ocean Explorerimi issimasunik 206-iusunik qujanartumik ajoqusertoqarsimanngilaq.

Issittumi Sakkutooqarfik pingasunngornermi ullaakkut taama ilisimatitsivoq.

Takornariartaassuulli taassuma ikkarlisimaffimminit ulikkiartornerani nammineq kaanngarnissaa ilimanarpallaanngitsoq, Philip Max Cossen oqarpoq.

- Ocean Explorerimi ullualunngortuni ikkarleqqavoq, aammali tinikkiartortarlunilu ulikkiartortaraluartoq takornariartaassuup, taamaannerata ullormi ataatsimi marlunniluunniit assigiinngissutaa, ikkarlisimaffimminit nammineq kaanngarnissaanut sunniuteqangaarnavianngilaq. Sunniuteqarsimagaluarpatami ikkarlisimaffimminit nammineq kaanngareersimassagaluarpoq.

Umiarsuit allat ikiuukkunik iluanaarutigilluarsinnaagaat

Siriusip alapernaarsuisuneersut Ocean Explorerimut ikaarsimasut, Issittumi Sakkutooqarfik ilisimatitsivoq. Takornariartaassuarlu taanna ajutumeerujussuarsimanngitsoq, Siriusip alapernaarsuisuneersut nalunaarput.

Danmarkimi umiarsuaatileqatigiiffik, Sunstone, Ocean Explorerimik piginnittuuvoq. Ocean Explorerili australiamiut takornariartitseqatigiiffianit, Aurora Expeditionsimit, massakkorpiaq attartorneqartoq, Sunstone KNR-imut ilisimatitsivoq. Taamaammat oqaloqateqarniarutta Aurora Expeditionsimut attaveqaqquaatigut. 

Aurora Expeditionsimeersumik oqaloqateqarniaraluarpugut, KNR-imiilli saaffiginnissutivut akineqanngillat.

Philip Max Cossenip oqarnera naapertorlugu Ocean Explorerip piginnittua takornariartaassuup taassuma ikkarlisimaffianit kaanngartinniarnissaanut isumaginnittussarsiortussaavoq. Kaanngartinniarneranullu aningaasartuutit umiarsuaatileqatigiiffiup sillimmataanit akilerneqakkajupput. 

- Umiarsuartik imminiiginnarsinnaanngilaat. Kaanngartitsinermut aningaasartuuteqarnissamut pinngitsoornatik sillimmasersorsimasussaapput, Philip Max Cossen oqarpoq.

Umiarsuaatileqatigiiffinnut umiarsuarnik ikkarlissimasunik kaanngartitsinermik ilisimasalinnut ikiortiserinnissinnaapput. Aamma Ocean Explorerip ungasinngisaani kaanngartitsinermik ilisimasalinnik inuttallinnik, naammattunik motoorilinnik immallu itissusaanut naleqquttumik itsinilinnik umiarsuaqarpat, taakkua ikiortiserisinnaagaat, Philip Max Cossen oqarpoq.

Umiarsuaatileqatigiiffiillu umiarsuarsuarmik ikkarlissimasumik ikiuunnertik iluanaarutigilluarsinnaavaat.

- Umiarsuup nalingata 2-3 procentianiit 11-12 procentit tungaannut iluanaaruteqarfigisinnaavaat. Ocean Explorerip sananeqarnera 60 millionit dollarsit missaannik akeqarpoq, taamaammat ikkarlisimaffigisaanit kaanngartitsisoq ikiuunnini pillugu 3-4 millionit dollarsit missaannik iluanaaruteqarsinnaavoq. Aningaasarpaaluupput, Philip Max Cossen oqarpoq.

Annaassiniarnermut aningaasartuutit umiarsuaatileqatigiiffiup akilissagai

Issittumi Sakkutooqarfiup umiarsuaa alapernaarsuut, Knud Rasmussen, Ocean Explorerimut annaassiniariartorluni aallarsimalereertoq tallimanngornermi ullaakkut apuutissangatinneqarpoq.

Takornariartaassuarlu alla Ocean Explorerip qanittuaniittoq pinartoqassappat sillimaqqullugu marlunngornermi sumiiffimminiiginnaqquneqartoq Issittumi Sakkutooqarfik Facebookimi ilisimatitsivoq.

Ocean Explorerimi issimasunik qimagussuisoqartariaqalissappat, umiarsuaatileqatigiiffik takornariartaassuarmik piginnittoq taamaaliornissamut akisussaasuusoq, Philip Max Cossen oqarpoq.

- Umiarsuaatileqatigiiffik takornariartaassuarmi issimasunik qimagussuinissamut pinngitsoornani akisussaasuuvoq. Taamaaliorsinnaanngikkuni issimasuni ulorianartorsiortoqalerpat qimagussuinissamut ikiortiserinnittussaavoq.

Umiarsuit takornariartaatit ilisimasassarsiuutillu Tunumi nunap eqqissisimatitap eqqaanukarniat ilisimasassarsiornermut Namminersorlutik Oqartussanit akuersissuteqartussaapput. Akuersissut taanna umiarsuaatileqatigiiffiit annaassiniarnermut peruluttunillu qimagussuinermut  aningaasartuuteqarnissamut sillimmasersorsimasuunerannik uppernarsaataavoq.

Umiarsuilli allat, inuit inuiaqatigiillu nunat tamalaat isumaqatigiissutaat naapertorlugit ulorianartorsiortunik pinngitsoornatik ikiuisussaapput. Umiarsuarmilu issimasunik qimagussuinissaq pisariaqalerpat Issittumi Sakkutooqarfik tamatumani akisussaasuuneruvoq.

Kisianni Issittumi Sakkutooqarfik Danmarkip naalagaaffiata ataanittuusoq umiarsuarmi issimasunik qimagussuisimappat, tamatumunnga aningaasartuutit umiarsuaatileqatigiiffiup sillimmataanit akilerneqassapput.