Takornariartaat ikkarlittoq pillugu misissuinerit Kalaallit Nunaata politiivisa aallartippaat
Politiit takornariartaat Tunup Avannaarsuani ikkarlittoq pillugu misissuineq aallartikkaat, politiit tusagassiorfinnut nalunaarutigaat.
Tamanna Imarsiornermik Qullersaqarfiup politiinut suliassanngortitsinera pereersorlu pivoq.
Politiit, umiarsuaq sooq ikkarlissimanersoq, ikkarlinnermilu inatsisinik unioqqutitsisoqarsimanersoq, misissussavaat.
"Politeeq ataaseq umiarsuarmut ikitinneqarpoq tassani misissuinerit siulliit aallartissammata. Suliassat ilagaat inuttanik issimasunilu inunnik pisumut attuumassuteqarsinnaasunik allanik killisiuinissaq.” Tusagassiorfinnut nalunaarummi allapput.
Inunnik unnerluutiginnittoqanngilaq tigusarinnittoqaranilu.
Politiit paasissutissanik allanik tunniussaqarsinnaanngikkallarlutik ilanngullugu ilisimatitsissutigaat
Sirius-Patruljemeersut arfinillit umiarsuarmut takornariartaammut ullaaq ikipput ilaasut aqumiullu ajunnginnersut paasiniarlugu.
Issittumi Sakkutooqarfiup umiarsuaa Knud Rasmussen ikkarlittup tungaanut maanna ingerlaarpoq. Marlunngormat aallartinneqarpoq, tallimanngornermilu apuutissasoq ilimagineqarluni.
Maannali ingerlaarfiani silapiluppoq, Knud Rasmussenilu kigaallassimaarnini pillugu aatsaat tallimanngornermi unnukkut apuunnissartik ilimagaat.
