Takornariartaat ikkarleqqasoq kalillugu kaanngartinniarneqartoq
Takornariartaat 206-inik issimasulik, Tunup Avannaarsuani kalillugu ataasinngornerup ualikkuani kaanngarteriarneqaraluarpoq, kaannganngilarli, Issittumi Sakkutooqarfik Facebookikkut pingasunngorneq ualisoq nalunaarpoq.
Umiarsuaq nammineq kaanngarniaqqikkaluarpoq, sulili nunami allanngutsaaliugaasup kangerluisa ilaanni Alpefjordimi ikkarleqqalluni.
Ullaaq misileeqqipput, tamatumuuna Pinngortitaleriffiup ilisimatuussutsikkut umiarsuaa TARAJOQ, ulinnerani ikiorsiullugu, iluatsinngilarli.
- Ocean Explorer ullumi kaanngartinniarneqaqqippoq, Brian Jensen, Issittumi Sakkutooqarfimmi iliuuseqarnissanut immikkoortortami pisortaq, Kommandør Kaptajn, oqarpoq
Ulinnerani misiliisoqarpoq, iluatsinngilarli. Umiarsuaq nikilaaraluarpoq, sangutinneqarsinnaalluni, kaanngavinngilarli, oqarpoq.
Sirius-patruljemeersut ikkarlittumiipput
Angutit arfinillit Sirius-patruljemeersut ilaasut inuttallu qanoq innersut misissoriartorlugu takornariartaammut ullaaq ikipput. Siriusimeersut marluk suli issimapput politiillu, ikkarlinnermut atatillugu, killisiuisussat misissuisussallu paasiniaaneranni ikiuissalluni. (Sirius-Patruljen Tunup Avannaarsuani qimussit atorlugit nakutilliisuunermi saniatigut politiitut oqartussaaffeqarpoq, soorlu ilisimasassarsiornerit nunamilu allanngutsaaliukkami susassaqartut allat nakkutigaat.
- Sirius-patruljemeersut aqumiunik (inuttanik) oqaloqateqareerpoq umiarsuarlu misissuiffigereerlugu. Politiineersoq ikimmat, taanna misissuinerani aamma ikiussavaa. Politiit suliassaat, soorlu apersuinerit susoqarsimarneranillu paasiniaanerit, suliarilerpaat, Brian Jensen KNR-imut ilisimatitsivoq.
Issittumi Sakkutooqarfiup iliuuserisaa pingaarneq tassaavoq sakkutuut umiarsuaata Knud Rasmussenip ikkarliffimmkartinnera, Facebook-ikkut nalunaarput.
Knud Rasmussen marlunngornermi aallartoq tallimanngornerup ullaavani apuutissasoq naatsorsuutigineqarpoq.
Knud Rasmussenili, imartami maanna ingerlaarfimmini silarlunnera pissutigalugu kigaallassimaarpoq, apuunnissartillu tallimanngornermi unnukkut aatsaat pisinnaassasoq maanna ilimagilerlugu.
Knud Rasmussen sapinngisannguani malillugu apuunniarsarivoq, Sakkutooqarfik nalunaarpoq.
