Air Greenland FPU-lu isumaqatiginninniarnissaat novembarip 29-ani marlunngornermi aallartissasut pilersaarutaavoq.Assi: KNR, Anton Gundersen Lihn

Suliumajunnaarnissamik ilimasaarineq Air Greenlandimut nassiunneqareersorlu isumaqatiginninniartoqalersoq

Air Greenland aamma FPU timmisartumi saqisut isertitaat pillugu aaqqiagiinngereersullu maanna aaqqiiagiissaariniartartumit isumaqatiginninniarnissaannik piumasaqarfigineqarput.

Suliffeqarfiit isumaqatigiissutissaannut aaqqiiagiissaaniartartoq (forligsinstitutionen) maanna illuatungeriinnut, tassa Air Greenlandimut taakkulu sulisuisa peqatigiiffiannut FPU-mut aggersaavoq juullip nalaani suliumajunnaartoqannginnissaa anguniarlugu isumaqatiginninniaqqussummillu aallartitseqqusilluni.

Tamanna FPU-p isumalluarfigalugu tusagassiuutinut nalunaaruteqarpoq.

- Air Greenlandip ullumikkut isummaminiit allaanerussuteqartumik naaperiaaffigisinnaappatigut, taava juullip nalaani suliumajunnaartoqarnissaa pinngitsoortinneqarsinnaasoq qularinngilara. Maanna sooq issiaqatigiinnerluta immitsinnut eqqaasinnissarput piffissaalerpoq.

AAMMA ATUARUK Air Greenlandimi sulisut juullip nalaani suliumajunnaaratarsinnaasut

- Sulisut silaannarmi pisinnaatitaaffii qulakkeerumallugit taavalu suliaq pingaartoq, tassalu inunnik Kalaallit Nunaanniit, tamaanga tamaanilu angallassineq, naammassiumallugu.

FPU-meersoq Anders Mark Jensen tusagassiuutinut nalunaarummi allappoq.

Saqisut decembarip ulluisa aappaanni suliumajunnaarsinnaanissaat Air Greenlandip ilimasaarutigalugu KNR-imut allapput. Taakku juullip nalaani suliumajunnaaratarsinnaanissaannik ilimasaaruteqarlutik novembarip 21-ani tusagassiuutinut nalunaarummik saqqummiussipput.

Air Greenland FPU-mut akissuteqartoq

Air Greenlandimi saqisut coronap nalaani timmisartuutileqatigiiffimmut tunniussaqangaatsiarsimanerat FPU-p KNR-imu tippassaq pingasunngornermi oqaatigaa, tamannalu pillugu akissarsiaasa qaffaavigineqarnissaat peqatigiiffiup piumasaraa.

Tamanna Air Greenlandimit isumaqatigineqanngilaq.

- Coronap nalaani timmisartuussinerit ikilingaatsiarpagut, sulisuttalu timmisartuussinissai aamma ikinnerungaatsiarlutik, taamaammat suliassiissutigut annikinnerupput. Tassa Air Greenlandimi sulisut qiviassagutsigit saqisut sulisunut allanut sanilliullugit suliassakinnerupput, Air Greenlandimi isumaqatiginninniarnermi aqutsisoq, sulisoqarmullu pisortaq, Mads B. Christensen tusagassiuutinut nalunaarummi allappoq.

AAMMA ATUARUK Peqatigiiffik suliumajunnaartoqarsinnaaneranut: Sulisut tunniusimallutik Air Greenlandimut ikiuuttuarput

Timmisartumi saqisut 2020-mi apriilimiit jarnuaarimut 2022-ip tungaanut akissarsiaasa qaffaatissaralui unitsinnneqarallarallarput, coronallu nalaani akissarsiaat fem procentimik ikilineqarnerat, FPU-p aamma KNR-imut oqaatigaa.

Saqisut timmisartuutileqatigiit Air Greenlandimut pilliuteqangaarsimasut, peqatigiiffik isumaqarpoq.

Tamanna timmisartuutileqatigiiffimmit isumaqatigineqanngilaq.

- Coronap nalaani Air Greenlandimi sulisut akissarsiaasa appaavigineqarnissaat kissaatiginikunngilarput. fem procentinik appaasoqarnissaa, atorfiit ilaasa pigiinnarnissaa siunertaralugu peqatigiiffiup nammineerluni kissaatigalugu aaqqissuussaraa, Mads B. Christensen naqissusiivoq.

Air Greenlandimi saqisut timmisartuutileqatigiiffinnut allanut sanilliullugu sulinermikkut pitsaanerusunik atugassaqartinneqartut, Air Greenland isumaqarpoq.

Air Greenlandip killilersuutit peerniarpai

Air Greenland isumaqarpoq saqisumi suliffeqarnikkut atugaat, timmisartuutileqatigiiffinnut allanut naleqqiullugu pitsaanerusut.

- Isumaqatigiissut assigiinngitsutigut killeqarpoq, Air Greenlandillu siunissami unammillersinnaanerunissaa pillugu tamanna allanngortikkusupparput. Killilersuutimmi pissutaallutik suliat tamakkiisumik ingerlanneqanngikkaluartut akissarsiat tamakkiisut tunniuppagut, Mads B. Christensen oqarpoq nangillunilu:

- Taamaammat akissarsiaasa qaffaavigineqarnissaat isumaqataaffigisinnaavagut, sulisulli qaqugukkulluunniit suliartortariaqarsinnaanissartik piareersimaffigissavaat, sulinissamut najoqqutissat ajornannginnerusumik suliarisinnaalerniassagatsigit, sulissunillu taamaalilluta atorluaanerusinnaaniassagatta

Air Greenland FPU-lu isumaqatiginninniarnissaat novembarip 29-ani marlunngornermi aallartissasut pilersaarutaavoq.

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl