Air Greenlandimi sulisut juullip nalaani suliumajunnaaratarsinnaasut
Air Greenlandip timmisartuutaanut ilaallutit juullisioriassamaarpit imaluunniit ukiortaasioriassamarpit? Tamanna nalunartumik inissisimasinnaavoq.
Juullimmi nalaani Air Greenlandimi, Air Greenlandillu timmisartuutaani sulisut suliumajunnaarnissaminnik ilimasaaralutik tusaagassiuutinut nalunaarteqarput.
- Ukiuni marlunni kingullerni angalasut Corona pissutigalugu juullisioriarnerinik kalluarneqangaatsiareersullu FPU-mit suliumajunnaartoqarnissaanik aappassaanik nalunaarut juullisiorianik angallassinitta nalaani takkuteratarsinnaavoq, tamannalu ajuusaarutigeqaara, Air Greenlandimi pisortaaneq Jacob Nitter Sørensen tusagassiuutinut nalunaarummi allappoq.
- Isumaqatigiissuteqarnissarput, taamaalillutalu akerleriilinnginnissarput, soorunami neriuutigaara.
Isumaqatiginninniarnerit aalajangiisuussasut
Air Greenlandimi Air Greenlandillu timmisartuutaani sulisut peqatigiiffiat, ACU, danskit kattuffiani Flybranchens PersonaleUnion, FPU-mi ilaasortasut siornali isumaqatiginninniareerlutik maannamut kinguneqartitsisoqanngilaq.
Taamaammallu Air Greenlandimi sulisut suliumajunnaarnissaminnik ilimasaaralutik tusagassiuutinut nalunaaruteqarput.
- Air Greenlandimi akissarsiat sulinermilu atugassarititaasut pitsaasut attatiinnarumavagut, tamannali siunissaq ungasinnerusoq eqqarsaatigalugu aamma nammassinnaasariaqarparput, Jacob Nitter Sørensen oqarpoq.
- Tamatumunnga atatillugu isumaqatigiissutini maanna atuuttussani pisisartutsinnut billetsinik akikinnerusunik siunissami neqerooruteqarsinnaanissaq aningaasaqarnikkut inissaqartittariaqarparput.
Ukiut kingulliit pingasut Air Greenlandimut unammillernarsimapput. Ukiut siulliit marluk Covid-19-ip tuniluunneratigut, suliffeqarfilli allanut sanilliullugu ajornartoornermit ajorisassaanngitsumik aniguigaluartoq ukiut marluk taakku sulisunut artornarsimapput.
AAMMA ATUARUK Air Greenland aalajangiusimasoq: Timmisartuni mekanikerit suliumajunnaarniartut mattunniarai
Ukiorlu manna silarlungaatsiarneranik angalasunut timmisartuussinerpassuarnik taamaatitsiinnarnermik kinguaattoornermillu, eqqugaavoq.
FPU suliumajunnaartoqarnissaanik aappassaanik nalunaaruteqarpat/nalunaaruteqassappat Forligsinstitutionenimi isumaqatigiissuteqartoqanngippat ullut arfineq-marluk qaangiuppata akerleriinneq atuutilissaaq.
Taamaattoqassappat Air Greenlandip timmisartuussinissat tamaasa taamaatillugillu billetsinut akiliutaasut utertillugilluunniit billetsit allanngortissavai.