Peqatigiiffik suliumajunnaartoqarsinnaaneranut: Sulisut tunniusimallutik Air Greenlandimut ikiuuttuarput
Air Greenlandimi sulisut juullip nalaani suliumajunnaarsinnaanerat timmisartuutileqatigiiffiup ataasinngornermi tusagassiutinut nalunaaruteqarlutik ilimasaarutigaat.
Tamanna Air Greenlandimi taakkulu saqisuisa peqatigiiffianni, Flyvebrancherns Personale Unionimi (FPU) akissarsianut isumaqatigiissutissap nutaap isumaqatigiinngiffiuneranik peqquteqarpoq.
Illuatungeriit siorna oktobarimili isumaqatigiinnialerput. Isumaqatiginninniarnerilli ukioq manna apriilimi angusaqarfiunngimmata, FPU suliumajunnaarnissamik ilimasaaruteqarpoq.
AAMMA ATUARUK Air Greenland advarer om mulig strejke under juleferie
Air Greenlandimi isumaqatigiinniarnernut aqutsisoq, sulisoqarnermut pisortaq Mads B. Christensen tusagassiuutinut nalunaarummi ima paasissutissiivoq:
- Neqeroorutigisatsinni sulinissamik pilersaarusiornitsinni ullumikkumiit eqaannerusumik pilersaarusiorsinnaajumalluta akissarsiatigut qaffaanissamik piviusorsiortumik kissaateqarpugut, Mads B. Christensen oqarpoq.
Sulisut aningaasarsiaasa qaffaatissaatut Air Greenlandimit isumaqatiginninniutigineqartoq, timmisartumi saqisut kattuffianit FPU-mit ilisariuminaatsinneqarpoq
- Suliffeqarfiup ilaasortatsinnut akissarsiatigut qaffaanissamik piviusorsiortumik neqerooruteqarnerarnerat ilisarisinnaanngilarput.
Sulisut Air Greenlandimut tunniussingaatsiartartut
Tamatuma saniatigut saqisut timmisartuutileqatigiit Air Greenlandimut pilliuteqangaarsimasut, Kasper Svendsen isumaqarpoq.
- Sulisut eqqartukkagut tassaapput ajornartoornerni assigiinngitsuni suliffeqarfimmut ikiuuttuartarsimasut. Suli coronamik ajornartoortoqanngitsoq, ajornartoornerup nalaani kingornalu kiisalu aasaq manna ajornartoornerup nalaanni sulisut suliffeqarfimminut akisussaassuseqaqqissaarsimapput, taanna oqarpoq.
Assersuutigalugu 2020-mi apriilimiit jarnuaarimut 2022-ip tungaanut saqisut akissarsiaasa qaffaatissaralui unitsinnneqarallarallarput, coronallu nalaani akissarsiaat fem procentimik ikilineqarlutik. Kasper Svendsen KNR-imut mailerluni allappoq.
Assersuutigalugu Air Greenlandimi sulisut ilarpassuisa akissarsiassaat coronap nalaani 2020-imi qaammat marts aamma april tunniunneqaratik uninngatiinnarneqarput.
AAMMA ATUARUK Isumaqatigiissut nutaaq: Air Greenlandimi sulisut akissarsiaat uninngatiinnarneqaqqissinnaasut
Tamanna Sulisut 540-it akissarsiaasa affaat angullugit uninngatiinnarneqarallarnissaat isumaqatigiissutaaneranik kinguneqarpoq. Taakku saniatigut Air Greenland soraarnerussutisiassanut akilersuisarnerminik unitsitsigallarnissaminut aamma akuerineqarpoq.
- Tapersersorneqangaatsiarpugut, tamannalu nuannersuuvoq, Air Greenlandip pisortaanera Jacob Nitter Sørensen nittartakkatigut tusagassiisarfik Check-in.dk-mut taamani oqarpoq.
Maannali pissutsit mumipput. Timmisartunimi saqisut maanna tarpersersorneqaratik misigisimapput.
- Timmisartumi saqisut timmisartortitseqatigiiffimmik akisussaatinninarneqarnerat suliffeqarfiullu amigaataanik matussusiitinniarneqarnerat isumaqatiginngilarput. Saqisummi timmisartuutileqatigiiffimmut tunniusimallutik tapersersuerujussuareernikuupput, Kasper Svendsen oqarpoq.
Mittarfittaarutta billetsit akikinnerulersinnaasut
2017: 71,1 millionit koruunit
2018: 80,8 millionit koruunit
2019: 106,6 millionit koruunit
2020: 32,6 millionit koruunit
2021: 153,6 millionit koruunit
Air Greenlandip ukiuni tulleriinni sinneqartuungaastiartarnera eqqarsaatigissagaanni saqisut akissarsiaasa qaffanneqarnissaasa akerlilerneqarnerat taassuma paasiuminaatsippaa.
Air Greenlandip 2017-imiit 2020-p tungaanut sinneqartoorutaannut siorna sinneqartoorutinut sanilliullugu sinneqartooruteqangaatsiarsimasoq ukiumut nalunaarusiaani 2021-imeersumi takuneqarsinnaavoq.
Sinneqartoorutilli mittarfittaassat atulerpata unammillerteqalernissamut atorneqarnissaat piviusorsiornerussasoq Air Greenlandimi pisortaaneq Jacob Nitter Sørensen isumaqarpoq. Taamaammallu isumaqatigiinniarnerit siunissami imminnut akilersinnaanerulernissaat orniginartinneruaa.
- Tamatumunnga atatillugu isumaqatigiissutini maanna atuuttussani pisisartutsinnut billetsinik akikinnerusunik siunissami neqerooruteqarsinnaanissaq aningaasaqarnikkut inissaqartittariaqarparput, taanna oqarpoq.