Isumaqatigiissut nutaaq: Air Greenlandimi sulisut akissarsiaat uninngatiinnarneqaqqissinnaasut
Air Greenlandimi sinniisut pisortallu sulisut akissarsiaasa ilaat soraarnerussutisiassaallu apriilimi kinguartinneqassasoq isumaqatigiissutigaat.
Nunarput tamaat marsip ulluisa 18-iannit timmisartuussivigineqaqqusaajunnaarpoq.
Timmisartut apriilip ulluisa arfineq-pingajuata tungaanut uninnganissaat aallaqqaammut siunertariaqaraluarpoq.
Timmisartuusseqqusaannginnerli kingornatigut sivitsorneqarpoq. Timmisartut siusinnerpaamik apriilip ulluisa 30-anni angalasinnaaleqqissapput.
Sermitsiaq.ag taama allaaserisaqarpoq.
- Sulisut suliffimmut tapersersuiniarlutik piareersimanerat assorsuaq nuannaarutigaara, pisortaaneq, Jacob Nitter Sørensen Sermitsiaq.AG-mut oqarpoq.
- Isumaqatigiissummi immikkuualuttut ilaat suli inissinneqanngillat, sapaatilli akunnerani matumani isumaqatigiissut inissinneqassasoq naatsorsuutigaara, taanna qarpoq.
Isumaqatigiissutip ullumi inissilluarnissaa naatsorsuutigineqartoq Air Greenlandip KNR-imut paasissutissiissutigaa.
AAMMA ATUARUK Millionerpassuarnik annaasaqartoq: Timmisartuusseqqusaannginneq Air Greenlandimut annaasaqaataasoq
Nunatta iluani aamma Danmarkimit Danmarkimiullu timmisartuussisartut sapaatini-akunnerni qassiiusuni maanna angalanngillat. Coronallu ajornartorsiortitsinera timmisartuutileqatigiiffiup aningaasartuutigingaatsiarpaa.
Timmisartuutileqatigiiffiup aningaasat qanoq annertutigeqqissaarnerat paasissutissiissutigerusunngilaa, Jacob Nitter Sørensenilli KNR-imut siusinnerusukkut ima oqaatigaa:
- Apriilimi kaaviaartitassagut tamngajaasa annaavagut. Sivitsuisoqarneratigut annaavagut. Tamanna millionerpassuarnik naleqarpoq. Soorunami suliffeqarfimmut uatsitut ittumut innarliingaatsiarneruvoq.
Sulisut pissutsit taamaannerat pissutigalugu akissarsiammi ilaannik uninngatitsiinnartoqarsinnaanera marsimi isumaqatigiissutigaat. Isumaqatigiissut nutaaq tunngaviit taakku assigalugit suliarineqartoq Air Greenlandip paasissutissiissutigaa.
Isumaqatigiissut malillugu aningaasarsiaqarnerpaat akissarsiassaasa 50 procentiannik uninngatitsiinnartoqartussatut ilusilerneqarpoq. Tamatuma kingorna 10 procentimik annertusiartortoqarpoq.
Sulisut qaammammut 34.000 koruuninik annikinnerusumilluunniit akissarsiaqartut akissarsiassaannit uninngatitsiinnartoqanngilaq. Isumaqatigiissut qaammammi ataatsimi atuuttassaavoq, akissarsiassallu uninngatiinnarneqartut kingusinnerpaamik aggustimi tunniunneqassallutik.
