Millionerpassuarnik annaasaqartoq: Timmisartuusseqqusaannginneq Air Greenlandimut annaasaqaataasoq
Nunatsinni timmisartuussinerup inerteqqutigineqarnera aqagumut atuunnissaa pilersaarutaagaluarpoq.
Naalakkersuisulli siulittaasuata, Kim Kielsenip tamanna sivitsorneqartoq, tusagassiortunut marlunngornermi ualikkut katersortitsinermini oqaatigaa. Timmisartut apriilip 30-at ilanngullugu angalassanngillat.
Taamaalilluni nunatta iluani nunattaluunniit avataanut piffissami aggersumi timmisartumut ilaasoqarnavianngilaq. Tamanna Air Greenlandimut innarliisoq, timmisartuutileqatigiiffimmi pisortaanerup, Jacob Nitter Sørensenip oqaatigaa.
AAMMA ATUARUK Tamaat isigalugu: Nuummi killilersuisoqaannassasoq - sineriammili atuarfeqarfiit annikitsukkuutaartumik ammassasut
- Apriilimi kaaviaartitassagut tamngajaasa annaavagut. Sivitsuisoqarneratigut annaavagut. Tamanna millionerpassuarnik naleqarpoq. Soorunami suliffeqarfimmut uatsitut ittumut innarliingaatsiarneruvoq.
- Tamatuma saniatigut inuit aasaanerani angalanissaminnik allanullu angalanissaminnut inniminniinnginnerat malugisinnaavarput, tamatumalu maluginera paasinarpoq. Piffissaq manna suliffeqarfimmut sakkortuvoq, pisortaaneq oqarpoq.
Billettit utertinneqassasut
Apriilip ulluisa arfineq-pingajuanniit apriilip ulluisa 30-annut angalasussat billettii utertinneqassapput, timmisartuussinissamummi pilersaarutit malillugit timmisartuussisoqarnavianngimmat.
- Tamanna soorunami piffissami tannani isertitassanik annaasaqarfiuvoq. Kisianni nunarsuaq tamakkerlugu tunillaassuunnerup ineriartornerata malinnaaffigineratigut piffissap sivitsornissaa naatsorsuutigereerparput, Jacob Nitter Sørensen oqarpoq.
Coronamik ajornartorsiortoqarnera timmisartuutileqatigiiffimmut sapaatini-akunnerni kingullerni aningaasartuutaangaatsiarpoq. Pisisoqarnerata malitsigisaanik sulisut akissarsiassaasa ilaat uningatiinnarneqassasut sulisunut isumaqatigiissutigineqarpoq.
AAMMA ATUARUK Air Greenlandimi sulisut akissarsiaasa affaat uninngatiinnarneqarallassasut
Taama iliortoqaqqissinnaasoq pisortaq oqaatigaa, tamannali suli aalajangerneqanngilaq
- Tamanna qanoq kinguneqassanersoq qanorlu ineriartortoqassangatinneripput pisortani misissussavarput, pisortaq oqarpoq, nangillunilu:
- Taavalu qanoq iliornikkut alloriartoqartariaqarnersoq misissussavarput. Akissarsiassanik uninngatitsineq sakkussat ilagaat.
- Allarpassuarnillu tiguneqarsinnaasunik aamma atorneqarsinnaasoqarsinnaavoq, piffissamulli ungasinnerusumut atatillugu aasamut ukiamullu qanoq aamma isikkoqarumaarnersoq misissuisariaqarpugut.
Coronalli ajornartorsiortitsinerata malitsigisaanik sulisunik soraarsitsinissamut piffissami matumani pilersaaruteqannginnerarpaa.