Sulisut amerlanerugunik aningaasaqarneq pitsaanerussasoq
Suliffissaaleqisulli sulilersinniarnerannut tunngaviit pingasut unammillissutaasut aaqqiiffigineqartariaqartut, Aningaasaqarnermut Siunnersuisoqatigiit nunatta aningaasaqarneranut nalunaarusiaminni nutaami naliliipput.
- Nammineq pilersorsinnaasut amerlanerusut suliffeqarunik Namminersorlutik Oqartussat kommunillu aningaasaqarnerat pitsaanerussaaq. Akileraarutit amerlanerussapput, isumaginninnermilu suliniutinut aningaasartuutikinnerussalluni. Tamanna inuiaqatigiit ataqatigiinneranni naligiissitsinerunissamut pingaaruteqangaatsiarpoq.
Aningaasaqarnermut siunnersuisoqatigiit siulittaasuat, Torben M Andersen taama oqarpoq.
Suliffissaaleqisulli sulilersinnissaannut akornutit pingasuusut, Aningaasaqarnermut Siunnersuisoqatigiit nalunaarutaanni allassimavoq.
Sulissatut periarfissat amerlanerpaartaat ilinniarsimanermik piumasaqaateqarput, suliffissaaleqisullu amerlanerpaartaat ilinniagakitsuunngikkunik ilinniagaqanngitsuupput.
AAMMA ATUARUK Nunatta aningaasaqarnera ajornartorsiuteqaleriartortoq
Suliffissatut periarfissat suliffissaaleqisut illoqarfigisanniinngillat. Suliffissaqarnissarlu pillugu nuukkusuttarneq naammanngilaq.
Kiisalu suliffit ilaanni aningaasarsiornissaq pisortaniit ikiorsiissuteqarnermiit akissarsiassartaqannginnerupput.
Unammillissutillu pingasut taakku peqqutigalugit suliffissarpassuit nunani allamiunik, pisariaqartunik ilinniagalinnik suliffissallu pillugit nuukkusuttunik inuttalersorneqartariaqarput.
Taakkunannga 1198-it, tassa affaat sinnerlugit sulinissaminnut piareersimapput. Naatsorsueqqissaartarfimmit kisitsisit taama takutitsipput. Taakkulu 1198-it sulilernissaannut unammillissutaasunut politikerinit aqqiiffigineqartariaqartut, Aningaasaqarnermut Siunnersuisoqatigiit tikkuarpaat. Naatsorsueqqissaartarfilli naapertorlugu suliffissaaleqisunut kisitsisit qularnalaartut tassami kommunit suliffissaaleqisunik nalunaarsuisarnerat assigiinngitsuuvoq.
AAMMA ATUARUK Siunnersuisooqatigiit sakkortuumik isornartorsiuipput
Aningaasaqarnermulli Siunnersuisoqatigiit naapertorlugit politiikerit ajornartorsiutaasunik isumaginninnermikkut aningaasaqarnermut pitsanngorsaataasumik alloriaateqarsinnaapput. Assersuutigalugu innuttaasup pisortanit ikiorsiissuteqarfigineqarttup ataatsip SIK malillugu minnerpaamik aningaasariaqalerneratigut nunatta karsia 100.000 koruunit tikillugit sipaaruteqarsinnaavoq.
Innuttaasoq pisortanit ikiorsiissuteqarfigineqartoq sulileruni akileraartalissaaq, nunattali karsia aamma pisortanit ikiorsiissutini sipaaruteqassaaq, nunamilu allamioq tikisitaq taamaallaat akileraarutitigut tapersiissuteqassalluni.
AAMMA ATUARUK Malittarisassat sukannersut ajornakusoortitsipput
Aningaasaqarnermut siunnersuisoqatigiit naliliipput, amerlanerusut sulilersinneqarneratigut ilinniartitaanerup qaffasissusaa pitsanngorsarneqassasoq, suliffillu pillugu inuit nuuttalerunik aningaasatigut iluanaarutissaqarnerussalluni. Piffissarlu sivisunerusoq isigalugu inuussutissarsiornermut periarfissat ineriartortinneqartariaqassaput.
AAMMA ATUARUK Sulisussanik amigaateqarneq nunamut tamarmut ajorsarneruvoq