Suliniutinut angisuunut inatsisip oqallisiginissaa IA-p qilanaarivaa

IA-p Inatsisartunut ilaasortaatitaasa marluusut tamanna arajutsisimanngilaat. Naaja Nathanielsenip Sara Olsvigillu allamiut suliartortut sulinngiffeqarnerminni akiliunneqarlutik angalasarnissaat paasisinnaanngilaat, Nunatsinnimi atorfinni allani sulisorpassuit taamatut pisinnaatitaanngillat.

- SIK-mit nalunaarutigineqarpoq sulisartunut allameersunut suliniutini angisuuni sulilersussanut sulinngiffeqarnermi angalanissamut akiliussisoqartalissasoq. Tamassumunnga tunngavilersuutit suuneri paaserusunnarput. Nunatsinni sulisartunut tamanut, sumiuuneq apeqqutaatinnagu,  sulinermi atugassarititaasut pitsaasut kissaatigaagut. Piviusormi unaavoq sulisartoqatigiit amerlanersaat sulinerminni isumaqatigiissutsiminni sulinngiffeqarnermi akiliunneqarluni angalasinnaaneq annaanikuuaat. Taamaallallu aningaasaateqarfinnut qinnuteqarsinnaalersitaasimallutik. Sulisartut allat sulinngiffeqarnerminni akiliunneqarlutik angalanissaminnut pisinnaatitaaffeqarnikuunngisaannarput. Nunatsinni sulisartut akornanni assigiinngisitsisoqannginnissaa qulakkeertariaqarparput, IA-p ilaasortaatita marluk tusagassiorfinnut nalunaaruteqarlutik taama allapput.

Sulianut angisuunut inatsimmi ukiaq akuersissutigineqartumi allannguutissat pillugit oqallittoqarsimanngitsorluunniit SIK-p siulittaasuata taama ersaritsigisumik oqaaseqaateqarsinnaanera tupaallannarpoq. Oqallisiginissaalumi Nathanielsenip Olsvigillu qilanaarivaat.

-Inuit Ataqatigiit ilimagilluinnaraat inatsisissamut allannguutaasussatut siunnersuutit pilersaarutaasut Naalakkersuisunit tusarniaanissanut nassiunneqarumaartut, inatsisissap kingunissai pillugit ammasumik oqallinnissaq siunertaralugu. Ilimagineqarpoq inatsisissatut siunnersuut upernaami ataatsimiinnissami aatsaat suliarineqarsinnaajumaartoq, ukiami ataatsimiinnissamut oqaluuserisassat tallimanngorpamut killeqarmata. Taamaaliornikkut oqallinneq pimoorussaq ilumoorunneqartorlu piffissalerluarneqassaaq, Sara Olsvig Radioaviisimut taama oqarpoq.

Sulisartut pisinnaatitaaffiisa isumannaatsumik aaqqinneqarnissaat siunnertarineqartoq, Sulisartut Kattuffiata siulittaasuata, Jess G. Berthelsenip oqaatigaa.

- Qangali siunnersuutigaarput Norgemi inatsisip atorneqarnerata assiga Nunatsinni atorneqartariaqartoq, tassami Norgemi nunat allamiut sulisinneqartut nunaqavissunit assiginik pineqartarput.

Siunnersuulli qanorpiaq imaqarnersoq Jess G. Berthelsenip maanna oqaatigisinnaannginnerarpaa, tassami isumaqatigiinniarnerq suli ingerlammata.

- Inatsisissat nutaaq siunnersuutigineqartoq pillugu maanna misissuileruttorpugut, taamaattumik tamanna pillugu annertunerusumik oqaaseqarsinnaanngilanga.

Sulisartut Kattuffiata siulittaasua, Jess G. Berthelsen taama oqarpoq.