Nunaqarfimmi atuarfiup pisortaa Suliffimmut nalimmassarsinnaaneq apeqqutaaginnarpoq
- Ilinniartitsisuussagaanni isumaqarpunga, illoqarfimmiikkaanni nunaqarfimmiikkaanniluunniit, ilinniartitsisutut naammasserlaajugaluaruniluunniit suliffimminut sumiiffimmilu suliffimminut najugarilikkaminullu naleqqussarsinnaanera apeqqutaaginnartoq.
AAMMA ATUARUK Ajornartorsiuteqarpallaarpoq Nuullu qimakkuminaalluni
Ilinniartitsisussaaleqineq, ilinniartut sulilernissaminnut piareersimanngitsut pitsaanerusumillu ilinniartitaaneq.
Tassa piffissami kingullermi oqaluttuarisartakkatta ilaat.
Nunaqarfinnili suliffimminnik nuannarinnilluinnartunik ilinniartitsisoqarpoq.
Suliffimmi nuannarigaanni nalimmassarsinnaallunilu unammilligassat ajornannginnerulertartut ilinniartitsisup oqaatigaa.
- Atuartunut attaveqarnerup qanorissusaa, atuartut tunuliaqutaat ilisimavallaarnagit Nuummi sulinikuuvunga kisianni ajornartorsiutiginagu. Kisianni Nunaqarfeeqqamut uteqqilluni assigiinngissutaa annerpaavoq inuit tunuliaqutaat suusut nalunagit taamaalillungalu aamma angajoqqavisa ilisarisimalluarneranni suleqatigiinnerup oqinnerunera taasinnaavara, Niaqornaarsummi atuarfiup pisortaa Julius Jeremiassen taamma oqarpoq.
Nunaqarfimmi Kangaamiuni ilinniartitsisuunissaq siunertaqarluartoq Kangaamiuni Atuarfiup pisortaa nassuiaavoq.
- Amerlanerpaatigut siuarsaarusunneq aammalu meeqqat alligunik atorfeqalersinnaanerat annerpaamik aqqutissiorusullugu toqqarsimavara, Barnabas Larsen taamma oqarpoq.
- Avannaata Kommunia: Ilinniartitsisussaaleqinerit 18-it
- Kommune Qeqertalik: Ilinniartitsisut katillugit 102-sut 18-it amigaatigineqarput
- Qeqqata Kommunia: Ilinniartitsisut katillugit 181-sut 14-it amigaatigineqarput
- Kommuneqarfik Sermersooq: Ilinniartitsisut katillugit 329-sut 27-it amigaatigineqarput
- Kommune Kujalleq: Ilinniartitsisut katillugit 102-sut 23-it amigaatigineqarput
Kommunini tamani katillugit: Ilinniartitsisut 100-ut amigaataapput.
Niaqornaarsummilu atuarfiup pisortaa Julius Jeremiassen isumaqataavoq:
- Allanartut oqaasiinik taasakkagut; qallunaatut tuluttut, taakku appasiffiusarput nunaqarfinni. Taamaattumik uanga piginnaasaqarfikka taakkua nunaqqatinnut atuartunut tunniunniarlugit. Taakku annerpaamik aaliangiisuunikuupput.
AAMMA ATUARUK Atuanngitsoortarnerit atuartitsinissamut ajoqutaasartut
Nunaqarfeeqqamiikkaannili immikkut ilisimasalinnik saaffigeriaannaqanngimmat nammineq aaqqiissutissanik ujartuinnartarpoq:
- Tassa unammillernartoqarpoq tassami ukiut kingulliit aatsaat naammattuuivugut taamatut ersinngitsumik nappaatilinnik. Taavalu periutsit assigiinngitsut, ilinniagarinngisagut. Kisianni ujartuilluta assigiinngitsunik periusaasinnaasunik misissuivugut, Barnabas Larsen oqarpoq.
