Ilinniartitsisut sinerissami sulerusunngitsut: Ajornartorsiuteqarpallaarpoq Nuullu qimakkuminaalluni
Ilinniartitsisussaaleqisoqarnera pissutigalugu atuarsimasassat atuartunit tamakkerneqanngitsoorneqarsinnaanerat Qaqortumi atuartut sinniisaata, Adina G. Jakobsenip, ernumassutigigaa KNR-imi sapaatit akunnerata siuliani oqaluttuaraarput. Atuarfianimi atuartitsinissat taamaatinnarneqakkajuttarput.
AAMMA ATUARUK - Ilikkagassaraluagut annaasarpagut
Ilinniartitsissussaaleqinerli Kommune Kujallermiinnaq ajornartorsiutaanngilaq.
KNR-ip oqarasuaatikkut sianerluni misissuinerata takutippaa ilinniartitsisunik atorfinitsitsiniarneq pingaartumik sinerissami illoqarfinni nunaqarfinnilu ajornartorsiutigineqartoq.
- Avannaata Kommunia: Ilinniartitsisut 18-it
- Kommune Qeqertalik: Ilinniartitsisunit 102-sussanit 18-it amigaatigineqarput
- Qeqqata Kommunia: Kisitsitsinik pissarsisinnaasimanngilagut
- Kommuneqarfik Sermersooq: Ilinniartitsisunit 329-sussanit 27-t amigaatigineqarput
- Kommune Kujalleq: Ilinniartitsisunit 102-sussanit 23-t amigaatigineqarput.
Ajornartorsiuterpassuit
Sinerissamilu ilinniartitsisunik atorfinitsitsiniarnerup ajornartorsiutaanera assigiinngitsunik pissuteqarpoq.
Ilinniartitsisutut sinerissami sulilersut ilagaat Arnarulunnguaq Reimer.
Taassuma Tasiilami ilinniartitsisutut sulinini nuannarigaluarlugu ukiup affaa qaangiummat suliunnaarpoq.
Atuartut ajornartorsiutigisaat ilinniakkaminut tunngatillugu oqimaappallaartut, taassuma nassuiaatigaa.
- Meeqqat ajornartorsiortut amerlasuupilussuupput. Ilinniartitsisut ikiussagunikkit qaffasinnerusumik ilinniagaqartariaqarput, Arnarulunnguaq Reimer taama oqarpoq.
Taanna ullumikkut ilinniartitsisutut suliunnaarsimavoq.
Nuuk qimakkuminaatsoq
Kali Mathiasen aamma ilinniartitsisutut ilinniagaqarpoq Nuummilu 2018 tikillugu atuarfinni assigiinngitsuni sulilluni.
Ilulissani ilinniartitsisutut atorfinnut arlalinnut qinnuteqaateqaraluarpoq, isummanili allanngortissimallugu. Nuummi qimakkuminaatsippaa.
- Ilulissani 2004-2005-imi najugaqarpugut. Ilinniareeruma Ilulissanut nuukkusukkaluarpugut. Nuummi inuuneq uannut ima nalinginnaalertigaaq illoqarfik qimakkuminaalluni, Kali Mathiasen, Nuummi ulloq unnuarlu paaqqinnittarfimmi maanna sulisoq oqarpoq.
Ilinniartitsisut piviusut tupaallaatigisaraat
Taamatut nassuiaatigineqartut IMAK-imi siulittaasup Birthe Møller Therkildsenip ilisarisinnaanerarpai.
- Pingaartumik ilinniartitsisutut naammasserlaat illoqarfeeqqamut pigaangamik piviusut tupaallaatigisarpaat. Aamma meeqqat immikkut pisariaqartitaqartut atuartinnissaannut imaluunniit angajoqqaanik suleqateqarnissamut piareersimaneq-ajortut takusarparput, Birthe Møller Therkildsen oqarpoq.
