Atuanngitsoortarnerit atuartitsinissamut ajoqutaasartut
Kalaallit 2015-2016-imi ilinniarnertuunngorniartut piffissap 13 procentiata 18 procentiatalu akornani atuariartunngillat. Atuarfiup atuanngitsoortartunik nalunaarsuiviata, Lectiop tamanna takutippaa.
AAMMA ATUARUK Kalaallit amerlanerusut ilinniarnertuunngorniartalersut
Aasianni GUX-imi ilinniarnermut siunnersortip, ilinniartitsisullu Sisse Birk Johansenip oqarnera naapertorlugu atuanngitsoortarnerit taartarnerani inuusuttut qasulaarnerannik meeraanerminniillu misigisapiluinit peqquteqartarput.
Atuariarnatilli isiginnaagassiat nangeqattaartut, sininnissaq pisiniarfilerinissarluunniit toqqaraangassuk ilinniarnertuunngornissaq ilimanaatikinnerulersartoq, Sisse Birk Johansenip aamma oqaatigaa.
- Tamanna naggaterpiaani kingunerluuteqarsinnaavoq, ilinniarnertuunngorniarfimmit anisitaasoqarsinnaammat, Sisse Birk Johansen oqarpoq nangillunilu ilinniarnertuunngorniarneq naleqassappat, taava ilinniartut atuariartorlutik ilikkagaqartarnissaat naatsorsuutigineqartariaqarnerarpaa.
AAMMA ATUARUK Ilinniarnertuunngorniat uniinnartarnerat misissuiffigaat
Atuartitsinermut kinguneqartartoq
- Ilinniartut ataasiakkaat inaarutaasumik misilitsinngitsoornerannik soorunami kinguneqarsinnaavoq.
Atuariartortannginnerli ilinniartunut ataasiakkaanut kisimi sunniuteqarneq ajorpoq. Atuartitsinissamut tamanna aamma kinguneqartartoq, Aasianni GUX-imi ilinniartitsisoq, Lars Krogsholm oqarpoq.
Taassuma qassit tiiminut takkunnissaat ilisimanngisaannaraanni eqimattakkaarluni suliaqarnissap pilersaarusiornissaa ajornakusoorsinnaasartoq ilaatigut assersuutigaa:
- Kisianni eqimattani ataaseq marlulluunniit amigaataajuaannaraangata suliaqarneq ataqatigiissaaruminaatsorujussuusarpoq. Aamma sisamanngornermi ullaakkut takkunnissaat naatsorsuutigisinnaanngikkaanni imminnut saqqummiiffigisaannissaat aamma ajornakusoortaqaaq. Taamaammat tamarmi ajalusoortarpoq. Tamannalu ilinniartitsisup atuartunut ilinniartitsinissaanut unammillernangaatsialertarpoq, Lars Krogsholm oqarpoq.
Ilinniartitsisut marluullutik Aasianni ilinniarnertuunngorniartut atuarnerup sivitsoriartortillugu pitsanngoriartortarnerat misigisarpaat. Epinionimilli kisitsit killormuuannik takutitsivoq - tassa 1 g-miit 3 g-mut atuanngitsoortarnerit amerliartortartut takutinneqarpoq.