Suiaassutsimut ilisimatooq: Oqaluttuarisaanermi politikkikkut naligiissitaaneq siuariartoqarpoq
Kommunimut qinigassatut sassartut allattorsimaffianni arnat amerlagisassaanngillat.
Apriilip ulluisa arfernannut qinigassanngortittuni 254-iusuni 77-iinaat marlunnik X-kromosoneqarput.
Tamannali Ilisimatusarfimmi suiaassutsimik ilisimatuup, Marie-Kathrine Poppelip tupaallaatiginngilaa.
- Oqaluttuarisaanermut tunngasumik eqqarsartariaqarpoq. Arnat 1948-mi aatsaat qinersisinnaanngorput, 1951-imili qinersisoqarmat qinersernaarlutik. Landsrådimut 1959-imi qinersisoqarmat, arnaq siullerpaalluni qinigaasoq tassaavoq, Elisibannguaq Johansen (1907-1993), taannalu ukioq 1975 tikillugu arnartatuaalluni issiasuulluni. Qineqqusaartuni arnanut sanilliullugit anguterpassuusinnaagaluartut assut siuariartortorujussuuvoq, taanna oqarpoq.
Arnat isaalermata
Oqartussaassuseqataalernissamulli arnat nammineerlutik iliuuseqarsimapput. Marie-Kathrine Poppelip 2002-mi Inatsisartuni qinersineq mumisitsinermut assersuutigaa.
AAMMA ATUARUK Angutit arnanit hunnorujunik amerlanerusut kommunimut qinigassanngortittut
Taamani Arnat Partiiat qineqqusaaqataapput. Partii politikkikkut inuussutissarsiornermilu nalingiissitsisoqalernissaanik arnanik pissaaneqalersitsinissamik siunertaqarpoq.
- Arnat partiiat ataasiaannarlutik qineqqusaarput isertitaqaratilli. Arnat Partiiata anguniagaa pilerseqqullugu, partiit allat arnanik sassarusuttunik amerlanerusunik qineqqusaartitsipput. Inatsisartuni kommuninilu isertut 19 procentimiit 36 procentimut amerlanerulersillugit naggataatigut iluatsippoq, Marie-Kathrine Poppel oqarpoq.
Parteeqarfinni kanngunarsaaneq
Maanna Arnat Partiiata arnatut akiuunnerata ukiut 20-t qaangiussimalersut, politikkikkut nalingiissitaanermut suli unammilligassaqarpoq.
- Arnat qineqqusaarnissartik orniginartinneq ajorpaat, ingammik inuusuttut. Parteeqarfinni arnanut inuussuttunut kanngutsaatsuliortoqartarsimasoq atuartarparput, Marie-Kathrine Poppel oqarpoq nangillunilu:
- Partiini angutinit utoqqasaaniit arnanik inuusuttunik kanngunarsaasoqartarsimappat, imaasinnaavoq politikkimik suliaqarnissaq orniginarunnaarsimassasoq.
AAMMA ATUARUK Pisortat ingerlatsiviisa qassiiusut naligiissitaanermut inatsit malinngikkaat
Tamanna uggornarpoq, suiaassutsimik ilisimatooq oqarpoq:
- Inuiaqatigiinni aalajangiisoqartussaatillugu angutinit arnanillu aalajangiisoqatigiittoqartarnera nalinginnaasuuvoq. Angutilli aalajangiisarnerni amerlanerussuteqartillugit, arnat ilisimasallit peqataatinneqanngitsoortarput.