Angutit arnanit hunnorujunik amerlanerusut kommunimut qinigassanngortittut
Apriilip ulluisa arfernanni qinersisoqalerpat kommunimut qinigassanngortittut allattorsimaffiat qiviaraanni angutit aqqi amerlapput.
Nunatsinni kommunalbestyrelsinut qinigassanngortittunit 254-init 177-it angutaapput, arnallu 77-iullutik.
Tassa imaappoq innuttaasut affaat arnaagaluarunik taakku 30 procentiinnaat qinigassanngortittuupput.
Kisitsit tamanna Nunatsinni Naligiissitaanermut siunnersuisoqatigiit uggoraa.
- Tamanna piorsarsimassutsimi tamakkiisumut takussutissiisinnaanera eqqarsaatigalugulu uggoraara. Politikkikkut piorsarsimassutsitsinni inuiaqatigiinnilu piorsarsimassutsitsinni. Arnat pillugit qanoq oqallorittoqartarneranut arnanullu qanoq isiginnittoqarneranut ilaatigut tunngassuteqarpoq, naligiissitaanermut siunnersuisoqatigiit siulittaasuat, Kathrine Bødker oqarpoq.
Kommuninut qinigassanngortittut
- Kommune Qeqertalik: Qinigassanngortittunit 40-nit 31-t angutaapput arnallu qulingiluaallutik.
- Kommune Kujalleq: Qinigassanngortittunit 39-nit 28-t angutaapput, arnallu aqqaniliullutik.
- Qeqqata Kommunia: Qinigassanngortittunit 48-nit 30-t angutaapput 18-illu arnaallutik.
- Avannaata Kommunia: Qinigassanngortittunit 60-init 44-t angutaapput 16-illu arnaallutik.
- Kommuneqarfik Sermersooq:Qinigassanngortittunit 67-init 44-t angutaapput 23-llu arnaallutik.
Taassuma qinigassanngortittut allattorsimaffianni suiaassutsit agguataarnerisa equnganerannut assigiinngitsunik nassuiaateqarsoraa.
- Arnat nuiumasut ilaat politikkimit anisimasut qiviaraanni taakku politikkikkut arnanut oqaluttarneq sakkortusoq eqqaavaat.
Inuiaqatigiit pillugit
Sulinermi pissutsit pissutaaqataavoq.
- Kommunimut nunatsinniluunniit politikeriugaanni politikkikkut suliaqarnermi assersuutigalugu anaanat kisermaat ilaqutariinniluunniit meerartalinni arnartaasut eqqarsaatigalugit suleriaaseqartoqanngilaq. Tamatumani arnat ilaqutariinni isumassuinermi pingaarnerpaamik akisussaaffeqartutut isiginittariaaseqarneq pissutaavoq.
Angutilli arnanit amerlanerusut politikkimut isernissaat iluamut ajornartorsiutaava?
- Aap, Kathrine Bødker oqarpoq.
Nunatsinni angutit arnallu
- Nunatsinni naatsorsueqqissaartarfiup innuttaasunut kisitsisaatai nutaanerpaat malillugu 2021-mi innuttaasut katillugit 56.421-t nunatsinni najugaqarput.
- Innuttaasunit 56.421-nit 29.749-t angutaapput, arnallu 26.672-iullutik.
- Tassa imaappoq inuiaqatigiinnit angutit innuttaasunit 52,73 procentiupput arnallu 47,27 procentiullutik.
Paasissutissarsiffik: Nunatsinni Naatsorsueqqissaartarfik
- Politikkimi inuiaqatigiit qanoq ilusilersorneqarnissaannut sinaakkusiisarpoq. Inuiaqatigiinnilu arnanik angutinillu assigiinngitsunik ukkatarinnittoqarnissaa inuiaqatigiit pillugit politikkikkut aalajangiinissamut oqallinnernullu pisariaqarpoq, siulittaasoq oqarpoq, aalajangersumillu oqarluni:
- Taamaammat pissusissamisoorluinnarpoq aamma soorunami politikkikkut suliaqartut arnat inuiaqatigiinni arnanik ersersitsigunik aalajangiinerit aaqqissuussinerillu ilaat soorunami pitsaanerussasoraakka.
Nunatsinni maanna borgmesterinit tallimanit pingasut arnaapput. Tamanna siuariarnerusimassaaq?
- Aap, siuariarnerullunilu pitsaalluinnarpoq. Tamannali arnat amerlanerusut sassarusilernerannik kinguneqanngilaq. Maannakkut qinersinissamut angutit arnanit marluk affaatalu missaannik amerlanerunerat ajornartorsiutaavoq.
Arnanut politikkimut iserusuttunut nangaasunullu qanoq siunnersuutissaqarpit?
- Inuiaqatigiinnut tapiissutigerusutannik uummammioqaruit qineqqusaarit politikkikkullu oqallittarnermut aaqqissuussaanermullu allanngueqataallutit. Arlaat taamaaliortariaqartoq tamatta eqqarsaannarsinnaanngilagut. Uagut aamma nammineq allannguinissamut tunngavileeqataassaagut.
