Pisortat ingerlatsiviisa qassiiusut naligiissitaanermut inatsit malinngikkaat
Inatsimmi erseqqissumik allaqqavoq:
Pisortat ingerlatseqatigiiffiini ilaasortat suaassusaat suiaassutsip aappaanit aappaa taamaallaat ataatsimik amerlanerussuteqarsinnaavoq.
Namminersorlutik Oqartussalli piginneqatigiiffiini 14-init arfineq-marlunni taamaattoqanngilaq.
Inatsisip taassuma pingaaruteqannginnera pillugu inuiaqatigiinnut takussutissiivoq, Naligiissitaanermut siunnersuisooqatigiit siulittaasuat, Kathrine Bødker oqarpoq.
Tamanna Visit Greenlandimi, Tele Greenlandimi, Air Greenlandimi, Royal Greenlandimi, Kalaallit Airportsimi, Illuummi, Royal Arctic Linemilu malinneqanngitsoq, KNR-ip kisitsinerisa takutippaat.
Naalakkersuisut siulittaasuata naalakkersuisoqarfia naapertorlugu Naalakkersuisut ingerlatseqatigiiffiit sulisunit siulittaasunut ilaasortaqanngitsut kisimik akisussaaffigai. Tamanna ingerlatseqatigiiffinnut arfineq-pingasunut atuuppoq, taakkunanngalu pingasut naligiissitaanermut inatsit malingilaat.
Tamanna Naligiissitaanermut siunnersuisooqatigiit siulittaasuata, Kathrine Bødkerip sakkortuumik isornartorsiorpaa.
- Isumaqarpunga inatsisiliortut namminneerlutik unioqqutitsinerat isornarluinnartoq. Unioqqutitsisinnaanerat, aamma unioqqutitsisinnaatitaaqattaaginnarnerat paasisinnaanngilara, siulittaasoq oqarpoq.
AAMMA ATUARUK Namminersorlutik Oqartussat ingerlatseqatigiiffiini paarlatsitsineq
- Tamanna naligiissitaanerup ukkatarineqannginneranik inuiaqatigiinnut takussutissiivoq. Inuiaqatigiit inatsisit pingaannginnerannik inatsisillu pimoorunneqannginnerannik takussutissiivoq, Kathrine Bødker nangilluni oqarpoq.
Illuummi inatsimmik malinninnginneq annerpaavoq, tassani siulersuisut ataasinnguamik arnataqanngillat, taamaalilluni suiaassutsip aappaanit kisimi sinniisuuffigineqarluni.
Kim Kielsen oqaaseqarusunngitsoq
Naalakkersuisut Namminersorlutik Oqartussat suliffeqarfiutaanni siulersuisunik katiterisartuupput. Taanna naalakkersuisut siulittaasuata, Kim Kielsenip (S) naalakkersuisoqarfiata akisussaaffigaa.
KNR-ip apeqqutigerusutai aaku
- KNR-ip apeqqutigerusukkaluarpaa sooq Naalakkersuisut naligiissitaanermut inatsimmik malinninnginnersut.
- Kim Kielsenip naligiissitaanermut siunnersuisooqatigiit isornartorsiornerat qanoq isumaqarfigineraa. Siulersuisullu katitigaanerat kalaallit inatsisaannut naleqquttunngorlugu allanngortikkusunneraa.
- Naligiissitaanermut inatsit malinneqarnissaanut siulersuisunik katiteriniarnermut suut unammillernartuusinnaanersut.
KNR-ip Kim Kielsen Siulersuisoqarnermullu aqutsisoqarfik siulersuisunut ilaasortassanik innersuussisartut qasseriarluni apersorniaraluarpai.
Siulersuisoqarnermut aqutsisoqarfimmit siinnisut Kim Kielseniluunniit apersorneqarusussimanngillat.
Piginneqatigiiffinni qassiiusuni sisamanngornermi allannguisoqarpoq, taamaakkaluartorli suiaassutsit agguataarneqarnissaannut allannguinermik periarfissaq atorneqanngilaq.
Naligiissitaaneq pillugu paasissutissat pisariaqartinneqartut
Naligiissitaanermut siunnersuisooqatigiit Naalakkersuisut tungaanniit naligiissitaanermut oqallinnermut, matumani Naligiissitaanermut inatsimmut atatillugu peqataasoqarnerunissaa ujartorpaat.
AAMMA ATUARUK Siulittaasoq: Kinguaassiuutitigut innimiilliorfigineqarneq paquminarunnaartariaqarpoq
- Naligiissitaanermut siunnersuisooqatigiit naligiissitaanermut inatsit 2013-imili atulersinneqarmat Naalakkersuisut inatsimmut atatillugu paasissutissiissuteqarlutillu inatsip qanoq atorneqarsinnaaneranut ilitsersuusiornissaat kissaatigisimavaa. Taamaaliortoqarneranilli takusaqanngisaannarpugut, taanna oqarpoq.
KNR-ip pisortat pigisaani suliffeqarfinni siulersuisuni arnat angutinik amerlaneruffisaanik misissuinermini Visit Greenland kisimi arnat amerlaneruffigigaat paasivaa. Uanili agguataarineq nikingangangaatsiarpoq, tassa siulersuisunut ilaasortanit arfinilinnit sisamat arnaapput.
Naligiissitaanermut inatsit UNA toorlugu atuarsinnaavat.
