Namminersorlutik Oqartussat ingerlatseqatigiiffiini paarlatsitsineq

Air Greenlandip siulersuisuisa siulittaasuat Kalaallit Airportsimi siulittaasunngorpoq. Bodil Marie Damgaard Air Greenlandip siulersuisuinut siulittaasunngorpoq.
Administrerende direktør i Air Greenland Jacob Nitter Sørensen og bestyrelesformand Bodil Marie Damgaard
Air Greenlandip pisortaanera, Jacob Nitter Sørensen siulersuisunullu siulittaasoq, Bodil Marie Damgaard. Assi © : Air Greenland
Allattoq Malik Brøns
novembarip 12-at 2020 13:31
Nutserisoq Connie Fontain

Namminersorlutik Oqartussat ingerlatseqatigiiffiini pingasuni ullumi sisamanngornermi immikkut ittumik ataatsimeersuartoqarpoq.

Tassami Air Greenlandimi, Kalaallit Airportsimi aamma Greenland Oil Spill Responsemi siulersuisut akornanni paarlatsitsisoqarpoq.

Air Greenlandip siulersuisuisa siulittaasuat, Kjeld Zacho Jørgensen siulersuisuniikkunnaarpoq. Siulittaasullu tullersortaa Bodil Marie Damgaard ingerlatseqatigiiffimmi siulersuisunut siulittaasunngortoq, Namminersorlutik Oqartussat siulersuisunut aqutsisoqarfiat allappoq.

Bodil Marie Damgaard Air Greenlandip siulersuisuini 2016-miilli ilaasortaavoq, 2019-miillu siulittaasumut tullersortaalerluni, Air Greenland tusagassiuutinut nalunaarummi allappoq.

- Ingerlatsivik siunissamut piareersimaniarluni timmisartuutinik taarsersuisussaavoq, siulersuisunilu ilaasortaqatikka pisortallu peqatigalugit suliassap taassuma ingerlateqqinnissaanut qilanaarpunga. Bodil Marie Damgaard Air Greenlandimi siulersuisunut siulittaasunngortoq oqarpoq.

KNI-p pisortaanera, Peter Grønvold Samuelsen Air Greenlandip siulersuisuinut aamma ilaalerpoq.

Kjeld Zacho Jørgensen Air Greenlandip siulersuisuiniikkunnaartoq Kalaallit Airportsip siulersuisuini siulittaasunngorpoq.

Akissarsiaritinneqartut apparneqartut

Kalaallit Airportsimi siulersuisunut siulittaasuuffik Jóhannus Egholm Hansenip nammineq kissaateqarnera aallaavigalugu tunuarneranit tassa oktobarip ulluisa aallaqqaataannili atuuffigineqanngilaq.

Namminersorlutik Oqartussat immikkut ittumik ataatsimeersuarnermut atatillguu Kalaallit Airportsimi siulersuisut siulittaasuanut akissarsiaritinneqartut 100.000 koruunimik aamma apparpaat. Taamaalilluni siulersuisunut siulittaasunngortoq, Kjeld Zacho Jørgensen siulersuisunut siulittaasuusimasumut ukiumut akissarsiaritinneqartut 750.000 koruunit pinagit ukiumut 650.000 koruuninnattassaaq.

Namminersorlutik Oqartussat uuliakoortoqaratarsinnaanermut upalungaarsimaffiutaanni, Greenland Oil Spill Responsemi siulersuisut aamma paarlatsinneqarput.

Steen O. Nielsen ingerlatseqatigiiffimmi siulersuisunut siulittaasuujunnaarluni siulersuisunut ilaasortanngorpoq.

Siulittaasup tullia, Oddbjørg V. Greiner siulersuisunut siulittaasunngorpoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk