Soraarnerussutissianut allannguutissaq tapersersorneqaraluartoq qulaajagassartaqarpoq
Aningaasat Kalaallit Nunaanni katersorneqartut Kalaallit Nunaanni akileraaruserneqarnissaat inatsisartuni ilaasortat tamarmik isumaqatigigaluaraat siunnersuutip kingunerisinnaasaannut nalornissuteqartoqarpoq.
Siunnersuutigineqartumi peqqinnissaqarfimmi sulisut ilinniarsimasut meeqqallu atuarfiini ilinniartitsisut Kalaallit Nunaanni sulilernissaminnut tunuarsimaalernissaat ernumassutigineqarpoq.
Partiit tamarmik isumaqatigiillutik oqarput aningaasat nunatsinni katersorneqartut nunatsinni akileraaruserneqassatut.
- Aningaasat nunatsinni pilersinneqarsimappata taava iluaqutissartaa nunatsinni atorneqartariaqarpoq anninneqarani, Siumut sinnerlugu siunnersuummut oqaaseqartitaq Jess Svane taama oqarpoq.
Aamma atuaruk Randi V. Evaldsen: Marloriarluni akileraartoqarnavianngilaq
Taamaakkaluartoq partiit oqaaseqartitaat tamarmiullutik oqarput aningaasatigut kingunerisinnaasai nalorininartut arlaqarput.
- Nunatsinni sulisitsininikkut pisariaqartinneqartut nunatsinnut tikikkumajunaarnerannik kinguneqarsinnaanera ernumanartoqartoq, Jess Svane oqarpoq.
Inuit Ataqatigiit siunnersuut tapersersorpaat taakkua aamma sulisut kattuffiisa aningaasatigut kingunerisinnaasaannut nalornineq ernumassutigineqarpoq.
- Kattuffiit ilaasortarisami aningaasatigut annertuumik annaasaqarnissaannik ernumallutik oqariartuuteqarnerat Inuit Ataqatigiinnit tusaanngitsuusaaginnarsinnaannginnatsigu siunnersuutigineqartup qulaajarneqarnissaa pillugu Aningaasaqarnermut Ataatsimiititaliamut suliassanngorllugu ingerlateqqipparput, Peter Olsen, Inuit Ataqatigiit, oqarpoq.
Aamma atuaruk Soraarnerussutisiassat ikinnerulernissaat ernummatigineqartoq
Soraarnerussutisiatut katersorneqartut soraarninngornermi ikinnerulersinnaanissaat sinnersuutigineqartumi Atassummit naammagineqanngilaq.
Soraarnerussutissiassat katersorneqartut soraarnerussutisiaqarfinnut ikineqartinnagit akileraaruserneqartalerpata soraarnerussutiassat ikinnerulissapput. Taamaatumik soraarnerussutisiassanik katersaqartut annaasaaqatigisassaasa suminngaanit aaneqarsinnaanissaat Atassummit misissorniarneqarput.
- Massakkut akileraaruteqanngitsumik katersuguit taakkua erniaat annertunerusussaagaluarput, massakkut akileraaruserneqarneqalernerisigut annaasaqarnerusinnaaneq ernmassutigineqarmat Aningaasaqarnermut Ataatsimiititaliamut suliassanngortillugu ingerlateqqinneqarpoq, Steen Lynge Atassut taama oqarpoq.
Aamma atuaruk Soraarnerussutisiaqalernissamut anguniagaq Nathanielsenip isornartorsiorpaa
Naalakkersuisut siunnersuutaanni qulaajaasoqartariaqartoq Demokraatit aamma isumaqarput.
- Sulisut kattuffii innuttaasullu soraarnerussutisianik katersaqartut siunnersuutip allannguutissai pillugit nassuiaanneqarnissaannik, Tillie Martinussen Demokraatit sinnerlugit siunnersuummut saqqumiussisoq taama oqarpoq.
Attaaviitsoq Naaja Nathanielsen soraarnerussutisiaqarneq tamakkiisumik qulaajarneqarnissaa pillugu ataatsimiititialiarsuarmik pilersitsinissamik tusarniaanermit akissuteqartut kaammaatuuteqarnerat tapersersorpaa tamannalu inatsisartut 2017-mi atatsimiinnissaata tungaanut pissasoq tusarniaanermi akissuteqartut kaammattutigaat.
Aamma atuaruk Soraarnerussutisiassanik ileqqaagaqarnermut akiliutit Naalakkersuisut akileraaruserniaraat
- Siunnersuutigineqartoq tamatsinnut kinguneqartussaavoq taamaattumik aallaqqaataaniit peqqissaartumik suliarineqarnissaa pisariaqarpoq, Naaja Nathanielsen oqarpoq.
Hans Enoksen Partii Naleraq, soraarnerussutisiat pillugit allannguutissatut siunnersuut tapersersorpaa, siunnersuutigineqartumi nunatta karsia 30-35 millionit koruuninik isertitaqarnissaanik missingiunneqarpoq.
- Maani sulinermi pissarsiat aamma nunamut maanga kinguneqartinneqarnerusariaqarpoq, tamanna Partii Naleqqami ilungersuupparput, Hans Enoksen Partii Naleraq oqarpoq.
