Soraarnerussutisiassat ikinnerulernissaat ernummatigineqartoq
Soraarnerussutisiaqalernissamut ileqqaakkat akileraarusigaanerisa siuartinneqarnissaat, Naalakkersuisunit anguniarneqarpoq.
Soraarnerusiaqarnermik aningaasaateqarfinnut nunani allaniittunut akiliinermi akileraartarnermut malittarisassat allanngortinnissaanut siunnersuut pillugu Peqqinnissaq Pillugu Kattuffiup, PPK-p, siulittaasuata ernumanartoqartippaa.
Aamma atuaruk Soraarnerussutisiaqalernissamut anguniagaq Nathanielsenip isornartorsiorpaa
- Soorunami ilaasortatsinnut sunniuteqassaaq, aningaasammi ikinnerit, nammineq uagut pissagut, sillimmasiinermut toqqortalissammata, PPK-mi siulittaasoq Olga P. Berthelsen oqarpoq.
Soraarnerusiaqarnissamik aningaasaateqarfimmi katersanit erniat ilaasortat iluanaarutissaat ikinnerulissasut, siulittaasup ernummatigaa.
Pissarsiassat allanngornavianngittut
Kattuffimmili ilaasortat ernumassutissaqanngitsut Danmarkimi sillimmasiisarfiit soraarnerussutisiaqalernissamullu katersaqarfiit peqatigiiffiat, Forsikring & Pension, isumaqarpoq.
- Tamanna akissarsiaqartumut allannguuteqarnavianngilaq. Aaqqissuussami nutaami ilanngaateqanngitsumik ileqqaarigaanni, aningaasat pisortat aningaasiviinut ingerlaannaq nakkartalissapput, Sillimmasiisarfiit soraarnerussutisiaqalernissamullu katersaqarfiit peqatigiiffianni siunnersortaaneq Karen Leth Jensen oqarpoq, nangillunilu:
- Akissarsiaqartulli pissarsiassai allanngornavianngillat, tassalu akilersuutit ilanngaateqartinneqartarsimanerattulli ernialersorneqartassallutik.
Pissutsit ullumikkut imaapput aningaasat soraarnerussutisiaqalernissamut aningaasaateqarfinnit tigunerini aatsaat akileraartoqartarluni. Siunissamili akiliutigineqartut akileraarusigaasalernissaat aningaasallu tiguneqartut akileraarusigaasassanngitsut Naalakkersuisut siunniuppaat.
