Soraarnerussutisiassanik ileqqaagaqarnermut akiliutit Naalakkersuisut akileraaruserniaraat

Soraarnerussutisiassanik millionerpassuarnik Danmarkimut nassiussuisarneq killeqartussangorpoq. Naalakkersuisut ukiumut 35 millionit koruunit missaannik ataavartumik isertitaqarfiunerusussamik siunnersuuteqarlutik tamanna naqissuserpaat.

Soraarnerussutisiassanut aaqqissuussinernut nunani allaniittunut akiliutigineqartartut akileraarusigaalernerisigut aningaasat pissarsiarineqassapput. Ullumikkummi imaappoq, aningaasat soraarnerussutisiaqalernissamut aningaasaateqarfinnit tigunerini aatsaat akileraartoqartarluni. Siunissami akiliutigineqartut akileraarusigaalissapput aningaasallu tiguneqartut akileraarusigaassanatik.

Aaqqissuussineq naleqqutinngitsoq 

Naalakkersuisut isumaqarput aaqqissuussineq maanna atuuttoq naleqqutinngitsuusoq, inuit sulinermik ilaa tamakkerluguluunniit Nunatsinni ingerlassinnarlugu soraarninngortussanngoraangamik nunanut allanut nuuttaarmata.

Taamaattoqarneratigut Nunatsinni sulinerminni ileqqaagaannit akileraarutitigut isertitassat nunanit amerlasuut nuuffigisartagaannit, soorlu Danmarkitut ittunit, pissarsiarineqartarput. Tamannalu nunatta karsianut ukiumut 35 millionit koruunit missaannik isertitassaraluatut annaasaqaataaffiusarpoq.

Aamma atuaruk Imeruersaatinut eqeernartulinnut akitsuut ilaatigut oqallisigineqassaaq

Aamma atuaruk Aaqqissuusseqqinnerup ileqqaagaqarnissaq pilerinarsisissavaa

Soraarnerussutisiaqalernissamut akiliutinik akileraarusiinissaq, Naalakkersuisut siunnersuutigisaattut siuartinneqassappat, tamanna nunatta karsiata ukiumut 55 millionit koruuninik isertitaqarnerulerneranik kinguneqassaaq. Aningaasaqarnermut naalakkersuisoqarfimmi pisortaq, Nikolai Sten Christensen, taama nassuiaavoq.

Nunatta karsiata 20 millionit koruuninik isertitaqarnerulernera, innuttaasut Danmarkimut nuunnatik Nunatsinni soraarninngortut nunat allat soraarnerussutisiaqalernissamut aningaasaateqarfiini ileqqaagaanneersuussaaq. Aningaasalli taakku nunatta karsianut atukkiussaannaassapput, soraarnerussutisiaqalernissamut aningaasaateqarfimmit aningaasat tunniunneqartut oqaatigineqartutut akileraarusigaanngimmata.

Danmark ajorsartuussaaq 

Siunnersuutip innuttaasunut aningaasartuutaannginnissaa pingaarnertut siunertaavoq. Tamatumanilu ajorsartutut oqaatigineqarsinnaasoq tassaavoq danskit naalagaaffiata karsia, pissarsiassaraluimi nunatta karsiata pissarsiarisalissammagit.

Naalakkersuisoqarfimmi pisortap aamma erseqqissaatigaa innuttaasut Danmarkimut nuuttut soraarnerussutisiaqalernissamut ileqqaakkaminnut akiliuteqarnerminni aningaasallu tiguneqarnerini marloriaammik  akileraarusersugaanissartik annilaangassutigissanngikkaat. Inatsisissatummi siunnersuut ima aaqqissuunneqarpoq, innuttaasut Danmarkimi soraarnerussutisiaqalernissamut aningaasaateqarfimmi ileqqaagaqartut, soraarnerussutisiassamik akileraarusigaanngitsumik tigunissaat toqqarsinnaassallugu.

Aamma atuaruk Utoqqalinersisinnaanermut ukiut qummut killigititat qaffanneqarput